បន្ទាប់ពីការចំណាយទឹកប្រាក់យ៉ាងច្រើននៅក្នុងការតម្លើងនូវរោងចក្រផលិតអេក្រង់ OLED ថ្មីរបស់ខ្លួន នៅពេលនេះ BOE ដែលជាក្រុមហ៊ុនផលិតអេក្រង់ដ៏ធំរបស់ប្រទេសចិន បានត្រៀមខ្លួននៅក្នុងការក្លាយខ្លួនទៅជាក្រុមហ៊ុនដែលឈានមុខគេទៅលើបច្ចេកវិទ្យាអេក្រង់ OLED ដោយអាចវ៉ាឈ្នះក្រុមហ៊ុន Samsung Display និង LG Display ទៀតផង។
តាមរបាយការណ៍ជាច្រើនដែលដកស្តង់ចេញពី Business Korea បានអោយដឹងថា ក្រុមហ៊ុន BOE បានបង្ហាញនូវគំរូនៃអេក្រង់ OLED ថ្មី នៅក្នុងព្រឹត្តិការណ៍ Innovation Partner Conference (IPC) នៅទីក្រុងប៉េកាំង ហើយក្រុមហ៊ុននេះ បានអះអាងថា គំរូថ្មីនៃអេក្រង់នេះ នឹងអាចផ្តល់នូវគុណភាពពណ៌បានច្បាស់ខ្ពស់ជាងបច្ចេកវិទ្យារបស់ក្រុមហ៊ុន Samsung ។
អ្វីដែលពិសេសនោះ គំរូនៃអេក្រង់ OLED របស់ក្រុមហ៊ុន BOE នេះ គឺមានកម្រិតដល់ទៅ 95% នៃស្តង់ដារ BT.2020 color gamut ។ បើមើលទៅលើអេក្រង់ W-OLED (White OLED) panels របស់ក្រុមហ៊ុន LG Display គឺមានកម្រិតខ្ពស់ត្រឹមតែ 70% ខណៈពេលដែលអេក្រង់ QD-OLED panels របស់ក្រុមហ៊ុន Samsung Display គឺមានកម្រិតដល់ទៅ 90% ប៉ុណ្ណោះ។
ភាពតានតឹងរបស់ក្រុមហ៊ុន Samsung Display និង BOE គឺមានកម្រិតខ្ពស់ផងដែរចាប់តាំងពីក្រុមហ៊ុន Samsung ព្យាយាមក្នុងការបញ្ឈប់ការនាំចូលអេក្រង់ OLED Display Clone ពីប្រទេសចិន ទៅកាន់សហរដ្ឋអាមេរិក ហើយក្រុមហ៊ុន BOE ក៏រងគ្រោះដោយសារតែរឿងនេះដែរ ដោយក្រុមហ៊ុន Samsung បានចោទថា ក្រុមហ៊ុន BOE បានក្លូនទៅលើអេក្រង់ Samsung OLED panels ដោយគ្មានការអនុញ្ញាត និងលក់ទៅកាន់សហរដ្ឋអាមេរិកតាមរយៈភាគីក្រុមហ៊ុនទី 3 ថែមទៀត។
ជាការឆ្លើយតបទៅកាន់ក្រុមហ៊ុន Samsung ដែលចង់ការពារទៅលើកម្មសិទ្ធិបញ្ញារបស់ខ្លួននោះ កាលពីឆ្នាំមុននេះ ក្រុមហ៊ុន BOE បានចាប់ផ្តើមតវ៉ាប្រឆាំងទៅកាន់ការចោទប្រកាន់ពីក្រុមហ៊ុន Samsung ជាច្រើននៅក្នុងប្រទេសចិន។
នៅពេលនេះ ក្រុមហ៊ុន BOE ក៏ចាប់ផ្តើមប្រកួតប្រជែងជាមួយនឹងក្រុមហ៊ុន Samsung Display តាមរយៈការសម្រេចបាននូវកម្រិតភាពច្បាស់អេក្រង់ដល់ទៅ 95% BT.2020 OLED របស់ខ្លួន។ គួរបញ្ជាក់ផងដែរថា អេក្រង់ OLED Panel ដាក់បង្ហាញនៅក្នុងព្រឹត្តិការណ៍ IPC នេះ គឺគ្រាន់តែគំរូប៉ុណ្ណោះ វាមិនទាន់មានការបញ្ជាក់ជាផ្លូវការថាពេលណានឹងមានការផលិតទ្រង់ទ្រាយធំនោះទេ។ របាយការណ៍ជាច្រើន បានបញ្ជាក់ថា ក្រុមហ៊ុន BOE ក៏ក្លាយជាក្រុមហ៊ុនផ្គត់ផ្គង់អេក្រង់ OLED សម្រាប់ក្រុមហ៊ុន Apple ផងដែរនោះគឺការផលិតអេក្រង់ OLED Panels សម្រាប់ស្មាតហ្វូន iPhone SE4 ៕
