យោងតាមការបញ្ជាក់ពីលោក Ming-Chi Kuo ដែលជាអ្នកវិភាគមួយរូប ដែលតែងតែធ្លាប់និយាយពីព័ត៌មាន Apple នោះ នៅថ្ងៃនេះ បានចែកចាយនូវព័ត៌មានថ្មីស្តីពីតម្រូវការរបស់ស្មាតហ្វូនជំនាន់ថ្មី iPhone 16 Pro និង iPhone 16 Pro Max ថែមទៀតហើយ។ អ្នកទម្លាយរូបនេះនិយាយថា តម្រូវការរបស់ស្មាតហ្វូនថ្មីនេះនៅលើទីផ្សារអាមេរិក និងទីផ្សារមួយចំនួនទៀតគឺមានចំនួនទាបជាងជំនាន់មុន។ លោក Kuo បន្តថា ទិន្នន័យខាងលើនេះ គឺផ្អែកតាមការស្ទង់មតិទៅលើសង្វាក់ផលិតកម្ម ហើយនឹងការនាំចេញស្មាតហ្វូនទាំងនេះនៅលើតាម Apple online store។
នៅក្នុងការចាប់ផ្តើមទទួលនូវការបញ្ជាទិញក្នុងសប្តាហ៌ដំបូងនោះ លោក Kuo បាននិយាយថា ការលក់ទៅលើស្មាតហ្វូនទាំង 4 នៃ iPhone 16 Series មានការឈានដល់ទៅចំនួន 37 លានគ្រឿង ដែលតួរលេខនេះមានការធ្លាក់ចុះជាង 13% ប្រៀបធៀបជាមួយនិងរយៈពេលដូចគ្នាសម្រាប់ការលក់ទៅលើស្មាតហ្វូន iPhone 15 series កាលពីឆ្នាំមុន។
អ្នកវិភាគរូបនេះបានបន្តថា ការថយចុះទៅលើចំនួននៃការបញ្ជាទិញសម្រាប់ iPhone 16 Series នេះ គឺដោយសារតែតម្រូវការនៃលក់ស្មាតហ្វូន Pro Series មានការធ្លាក់ចុៈ។ ប្រៀបធៀបជាមួយ iPhone 15 Pro និង iPhone 15 Pro Max សម្រាប់សប្តាហ៌ដំបូងនៃការបញ្ជាទិញទៅលើ iPhone 16 Pro គឺមានការធ្លាប់ចុះ 27% ខណៈដែល iPhone 16 Pro Max គឺមានការធ្លាប់ចុះ 16%។
លោក Kuo បានបញ្ជាក់បន្ថែមថា សម្រាប់ម៉ូដែលស្តង់ដារនៃ iPhone 16 និង iPhone 16 Plus គឺមានតម្រូវការខ្ពស់ជាង iPhone 15 និង iPhone 15 Plus នៅក្នុងសប្តាហ៍ដំបូងនៃការលក់នេះ។ Kuo បន្តថា កត្តានៃការលក់ទៅលើ iPhone 16 Pro Series មានការធ្លាក់ចុះនេះ អាចបណ្តាលមកពីក្រុមហ៊ុននៅមិនទាន់ដាក់អោយដំណើរការនូវបច្ចេកវិទ្យា Apple Intelligence នៅកំឡុងពេលដែលក្រុមហ៊ុនប្រកាសសម្ពោធជាផ្លូវការណ៌នាពេលកន្លងមក។ សូមជំរាបថា បច្ចេកវិទ្យានេះ អាចនឹងមានការប្រកាសចេញជាមួយនិង iOS 18.1 នៅខែតុលាខាងមុខនេះហើយ។ កត្តាសំខាន់មួយទៀតគឺដោយសារតែមានការប្រកួតប្រជែងជាមួយនិងស្មាតហ្វូនថ្នាក់ប្រណិតច្រើននៅក្នុងប្រទេសចិន។
