យោងតាមសេចក្តីរាយការណ៌ថ្មី បាននិយាយថា ក្រុមហ៊ុន Samsung បាននឹងកំពុងតែធ្វើការនៅលើស្មាតហ្វូនថ្នាក់កណ្តាលជំនាន់ថ្មី Galaxy A56 ហើយ។ បន្ទាប់ពីការទម្លាយចេញនូវព័ត៌មានថ្មីនេះ បានពីរសប្តាហ៌រួចមកនោះ ស្មាតហ្វូនថ្មីនេះ ត្រូវបានគេមើលឃើញថា បានឆ្លងកាត់ការធ្វើតេស្តនៅលើបញ្ជី Geekbench រូចរាល់ហើយ។ បើតាមការបែកធ្លាយមុននេះ គឺបានបញ្ជាក់ថា ស្មាតហ្វូនជំនាន់ថ្មី Galaxy A56 ថ្មីនេះ អាចនឹងមានការបំពាក់នូវបន្ទះឈីប Exynos 1580 SoC។ នៅថ្ងៃនេះ ព័ត៌មានជាច្រើនរបស់ស្មាតហ្វូននេះ គឺមានការបញ្ជាក់នៅលើបញ្ជី Geekbench ច្បាស់ហើយ។
បន្ទះឈីប Exynos 1580 ត្រូវបានគេមើលឃើញថា គឺមានកូដឈ្មោះ Santa ហើយពេលនេះ ក៏បានធ្វើតេស្តនៅលើស្មាតហ្វូននេះហើយ។ សូមជំរាបថា ក្រុមហ៊ុន Samsung បានធ្វើការនៅលើស្មាតហ្វូនជំនាន់ថ្មី Galaxy A56 នេះ ស្របពេលដែលខ្លួនកំពុងតែធ្វើការនៅលើបន្ទះឈីបជំនាន់ថ្មី Exynos 1580 SoC នេះដូចគ្នា។ នៅលើបញ្ជី Geekbench បានបង្ហាញថា Galaxy A56 រត់នៅលើន្ទះឈីប Exynos 1580។ សម្រាប់សមត្ថភាពរបស់ Exynos 1580 ត្រូវគេបញ្ជាក់ថា នឹងប្រហាក់ប្រហែលគ្នាជាមួយនិង Snapdragon 888។
គួរបញ្ជាក់ថាបន្ទះឈីប Exynos 1580 ត្រូវបានគេប្រទះឃើញជាលើកដំបូងកាលពីខែកក្កដាជាមួយនិងលេខម៉ូដែល S5E8855។ សម្រាប់ការធ្វើតេស្តនៅលើបញ្ជីនេះ បានបង្ហាញថា ស្មាតហ្វូនជំនាន់ថ្មីនេះ មានពិន្ទុ 1341 នៅលើការធ្វើតេស្ត single-core និងពិន្ទុ 3836 ទៅលើការតេស្ត multi-core។ សម្រាប់ស្មាតហ្វូន Galaxy A56 វិញ គឺមានលេខម៉ូដែល SM-A566B។ Galaxy A56 គឺក្លាយជាស្មាតហ្វូនជំនាន់ថ្មី Galaxy A series នឹងមានការបង្ហាញវត្តមាននៅលើទីផ្សារនាត្រីមាសទី 1 ឆ្នាំ 2025 ខាងមុខនេះហើយ។
