ក្រុមហ៊ុន Samsung ត្រូវបានគេរំពឹងថា នឹងមានការប្រកាសចេញជាផ្លូវការណ៌នូវស្មាតហ្វូនជំនាន់ថ្មី Galaxy S25 Series នៅដើមឆ្នាំ 2025 ខាងមុខនេះហើយ។ នៅពេលនេះ សមាសភាគជាច្រើនរបស់ស្មាតហ្វូនថ្មី ក៏ត្រូវបានគេទម្លាយនៅលើអនឡាញផងដែរ។ ថ្មីៗនេះមានការលេចធ្លាយនូវរូបភាពថ្មីមួយដែលបង្ហាញពីអេក្រង់របស់ស្មាតហ្វូនជំនាន់ថ្មីទាំង 3 នៃត្រកូល S25 Series នេះ។ រូបភាពនេះមានការចែកចាយដោយអ្នកទម្លាយ Ice Universe ដែលបញ្ជាក់យ៉ាងច្បាស់ពីអេក្រង់ស្មាតហ្វូននេះ។
Galaxy S25, Galaxy S25+ និង Galaxy S25 Ultra ត្រូវបានគេជឿជាក់ថា នឹងមានគែមអេក្រង់កម្រ៉ាស់ស្តើង ហើយនៅលើរូបភាពមួយនៅក្នុងចំណោមរូបភាពទាំងបីនេះ ក៏មានការបញ្ជាក់ពីគែមជុំវិញស្មាតហ្វូនម៉ូដែល Ultra មានរាងមូលផងដែរ។ យោងតាមប្រភពកន្លងមកធ្លាប់បានទម្លាយថា អេក្រង់របស់ស្មាតហ្វូនជំនាន់ថ្មី Galaxy S25 Ultra នឹងមានទំហំធំ 6.9 អ៊ីងប្រហែលគ្នាជាមួយនិងអេក្រង់របស់ iPhone 16 Pro Max អញ្ចឹង។ អេក្រង់នេះ ក៏នឹងមានគែមតូចជាង Galaxy S24 Ultra កម្រិត 0.2mm ផងដែរ។
ប្រភពខាងលើនេះបន្តថា ស្មាតហ្វូន Galaxy S25 Series នេះ អាចនឹងមានការប្រើប្រាស់នូវបន្ទះឈីប Exynos ជំនាន់ថ្មីរបស់ក្រុមហ៊ុន Samsung សម្រាប់ម៉ូដែលស្តង់ដារ និងម៉ូដែល Plus ខណៈដែលម៉ូដែល Ultra គឺនឹងមានការបំពាក់នូវបន្ទះឈីបជំជំនាន់ថ្មី Snapdragon 8 Gen 4។ ប៉ុន្តែមុននេះក៏មានការព័ត៌មានថ្មីមួយចំនួននិយាយថា ក្រុមហ៊ុន Samsung អាចនឹងមានការប្រើប្រាស់នូវបន្ទះឈីប Exynos 2500 សម្រាប់ស្មាតហ្វូនជំនាន់ថ្មីនោះទេ ដោយសម្រេចប្រើប្រាស់នូវឈីប Qualcomm គ្រប់ម៉ូដែលតែម្តង។