យោងតាមការសេចក្តីរាយការណ៌កន្លងមក បានបញ្ជាក់ថា Samsung នឹងមានការរៀបចំព្រឹត្តិការណ៌មួយនៅថ្ងៃនេះហើយ ប៉ុន្តែមិនបានបញ្ជាក់ថា នឹងមានការប្រកាសចេញនូវផលិតផលអ្វីនៅឡើយទេ។ មានការព្យាករណ៌ថា ក្រុមហ៊ុននេះនឹងបង្ហាញចេញនូវស្មាតហ្វូនអេក្រង់បត់បានជំនាន់ថ្មីរបស់ខ្លួនថ្មីមួយទៀតដែលមានឈ្មោះថា Galaxy Z Fold Special Edition។
គួរបញ្ជាក់ថា កាលពីខែមុនេះ ធ្លាប់មានការទម្លាយចេញនូវរូបភាពរបស់ស្មាតហ្វូនថ្មីនេះម្តងរួចហើយ។ សម្រាប់ថ្ងៃនេះ គឺមានការ ចែកចាយរូបភាពថ្មីរបស់ស្មាតហ្វូននេះថែមទៀតហើយ ដោយម្តងនេះ គឺជារូបភាពពិតៗតែម្តង។ រូបភាពថ្មីនេះត្រូវបានបង្ហោះនៅលើបណ្តាញ X តាមរយៈ @Jukanlosreve ដោយរូបភាពនេះ គឺជាស្មាតហ្វូនអេក្រង់បត់បានជំនាន់ដែលនឹងមានលក់នៅលើទីផ្សារប្រទេសចិន។
មានការព្យាករណ៌ថា ស្មាតហ្វូននេះ នឹងមានឈ្មោះថា “Samsung Galaxy W25.”។ ការសន្និដ្ឋានបែបនេះ គឺដោយសារនៅលើរូបភាពនេះ គឺមានការសសេរអក្សរចិននៅលើស្លាកឡូហ្កូនៅផ្នែកខាងក្រោម។ សម្រាប់ទីផ្សារប្រទេសកូរ៉េវិញ ស្មាតហ្វូនថ្មីនេះ គឺនឹងមានឈ្មោះថា Galaxy Fold Special Edition។ សូមជំរាបថា មកដល់ពេលនេះ នៅមិនទាន់មានព័ត៌មានជាក់លាក់ណាមួយពីស្មាតហ្វូនជំនាន់ថ្មីនេះនៅឡើយទេ។ មានការរំពឹងថា ស្មាតហ្វូនថ្មីនេះ នឹងមានកម្រ៉ាស់ស្តើងជាងម៉ូដែលស្តង់ដាររបស់ Z Fold 6។
ប្រភពកន្លងមកបានរាយការណ៌ថា ស្មាតហ្វូនថ្មីនេះ នឹងមានអេក្រង់ខាងក្នុងទំហំ 8 អ៊ីង ធំជាងម៉ូដែលស្តង់ដារ Z Fold 6 ដែលមានទំហំត្រឹមតែ 7.6 ប៉ុណ្ណោះ។ ហើយចំពោះអេក្រង់ខាងក្រៅវិញ គឺនឹងមានទំហំ 6.5 អ៊ីងខណៈដែលម៉ូដែលមុនមានទំហំត្រឹមតែ 6.3 អ៊ីង។ បន្ថែមពីនេះស្មាតហ្វូននេះក៏នឹងមានកាមេរ៉ាទំហំ 200MP ផងដែរ។ យោងតាមការទម្លាយចេញពី Ice Universe, បានអោយដឹងថា កាមេរ៉ាស្មាតហ្វូន នឹងមានសមត្ថភាពដូចគ្នាទៅនឹង Galaxy S24 Ultra អញ្ចឹង។