ក្រុមហ៊ុន Samsung ត្រូវបានគេរាយការណ៌កន្លងមកថា នឹងមានការប្រកាសចេញនូវស្មាតហ្វូនថ្នាក់ប្រណិតនៃត្រកូល Galaxy S series នៅក្នុងខែមករាខាងឆ្នាំក្រោយនេះហើយ។ ខណៈពេលនេះ គឺនៅសល់ពេលជាង 3 ខែទៀតនោះ នៅថ្ងៃនេះមានការទម្លាយនូវព័ត៌មានថ្មីៗជាច្រើនទាក់ទងជាមួយស្មាតហ្វូននេះថែមទៀតហើយ។ យោងតាមការបែកធ្លាយកន្លងមក គឺមានការបញ្ចេញនូវគំនូសព្រាងនៃការឌីស្សាញទៅលើស្មាតហ្វូននេះ ហើយសម្រាប់ពេលនេះ គឺមានបញ្ចេញនូវជម្រើសពណ៌ដែលនឹងប្រើប្រាស់នៅលើស្មាតហ្វូនជំនាន់ថ្មីនេះវិញម្តង។
យោងតាមការទម្លាយរបស់ Ice Universe ដែលជាប្រភពជឿជាក់បាននោះ គឺបានសសេរនៅលើបណ្តាញសង្គម X របស់ខ្លួនថា Samsung អាចនឹងប្រើប្រាស់ពណ៌ចំនួន 4 នៅលើស្មាតហ្វូនជំនាន់ថ្មី Galaxy S25 Ultra ដែលពណ៌ទាំងនោះរួមមានដូច ជាពណ៌ខ្មៅ, បៃតង, ទឹកបិក ហើយនិង “titanium.”។
សម្រាប់ពណ៌ខ្មៅ និង Titanium ត្រូវបានគេនិយាយថា អាចនឹងពណ៌មួយដែលមានសស្រាប់ពីជំនាន់មុន S24 Ultra រួចហើយ ដែលពណ៌នេះ គឺត្រូវបានគេស្គាល់ឈ្មោះថា គឺជាពណ៌ Titanium Black ឬ Titanium Gray ឬក៏អាចហៅថាពណ៌ Natural Titanium ដែលដូចគ្នជាមួយនិងព័ណ៌របស់ iPhones កន្លងមកអញ្ចឹង។ ប៉ុន្តែសម្រាប់ពណ៌ ទឹកបិក និងបៃតង អាចជាពណ៌ថ្មី។
ទាក់ទងនឹងជម្រើសពណ៌នេះ ជារៀងរាល់ឆ្នាំ ក្រុមហ៊ុន Samsung ក៏នឹងមានជម្រើសពណ៌ផ្សេងទៀតផងដែរ សម្រាប់ស្មាតហ្វូនជំនាន់ថ្មីរបស់ខ្លួននេះ ប៉ុន្តែមានដាក់លក់នៅលើតែទីផ្សារមួយចំនួន ឬក៏ហាងអនឡាញផ្លូវការរបស់ខ្លួនតែប៉ុណ្ណោះ។ ស្មាតហ្វូន S25 Ultra ដែលចេញឆ្នាំនេះ គឺនឹងមានការបំពាក់នូវឈីប Snapdragon 8 Gen 4 និងរ៉េមទំហំធំដល់ទៅ 16GB ហើយក៏នឹងមានការពង្រីកកាមេរ៉ាទំហំ 50MP ទៅលើឡែន ultrawide ផដែរ។ S25 Ultra អាចនឹងមានថ្មទំហំ 5,000mAh គាំទ្រនូវកម្លាំងសាក 45W wired fast charging ដូចជំនាន់មុន S24 Ultra អញ្ចឹង។
