គិតមកទល់នឹងថ្ងៃនេះ ព័ត៌មានរបស់ស្មាតហ្វូនជំនាន់ថ្មី Galaxy S25 series ត្រូវបានគេទម្លាយចេញនៅលើអនឡាញអស់ជាច្រើនរួចមកហើយ។ បើតាមដំណឹងមិនផ្លូវការណ៌ដែលបានទម្លាយកន្លងមង គឺមានការបញ្ជាក់ថា ស្មាតហ្វូនថ្មីនេះ នឹងមានការប្រកាសចេញជាផ្លូវការណ៌នៅត្រីមាសទី 1 ដើមឆ្នាំ 2025 ខាងមុខនេះ។ ទាក់ទងនឹងរូបរាងរបស់ស្មាតហ្វូនថ្មីៗទាំងនេះ គឺមានការលេចធ្លាយរូបភាពថ្មីៗចំនួនពីរ ដែលគេមើលឃើញថា ការឌីស្សាញស្មាតហ្វូននេះ គឺមានកម្រ៉ាស់ស្តើង និងមានគែមអេក្រង់តូចជាងមុនថែមទៀត។ រូបទីមួយគឺបន្ទះការពារអេក្រង់ និងរូបភាពទីពីរ គំរូ Aluminum Dummy របស់ស្មាតហ្វូននិមួយៗ។
តាមរយៈរូបភាពខាងលើនេះ ក៏មានការបញ្ជាក់ថា ក្រុមហ៊ុន Samsung ហាក់មានការផ្លាស់ប្តូរតិចតួចប៉ុណ្ណោះទៅលើការឌីស្សាញរូបរាងរបស់ស្មាតហ្វូន Galaxy S25 និង S25 Plus ខណៈដែលម៉ូដែល Ultra ត្រូវគេមើលឃើញថា មានការផ្លាស់ប្តូរការឌីស្សាញរូបរាងច្រើនគួរអោយកត់សំគាល់។ Galaxy S25 មានទំហំរួម 146.94x70.46x7.25mm, Galaxy S25 Plus មានទំហំរួម 158.44x75.79x7.35mm និង Galaxy S25 Ultra មានទំហំ 162.82x77.65x8.25mm។
ប្រភពខាងលើនេះបានបន្តថា ជាមួយនិងវត្តមាន S25 Ultra នៅឆ្នាំក្រោយនេះ គឺនឹងក្លាយជាស្មាតហ្វូនម៉ូដែលដំបូងគេរបស់ក្រុមហ៊ុន Samsung ដែលមានការប្រើប្រាស់នូវអេក្រង់រាបស្មើរ ដែលនឹងផ្តល់នូវភាពងាយស្រួលជាងមុនសម្រាប់ការបិទបន្ទះអេក្រង់ ហើយថែមទាំងមានការការពារអេក្រង់បានល្អជាងមុន ជាពិសេសគឺទៅលើការប៉ះបញ្ជាមុខងារនិមួយនៅលើអេក្រង់តែម្តង។
Galaxy S25 Ultra នឹងមានការបំពាក់នូវបន្ទះឈីប Snapdragon 8 Gen 4 ឬ Snapdragon 8 Elite ដែលមានការតម្លផងនូវបច្ចេកវិទ្យា AI ច្រើនជាងជំនាន់មុន។ ប៉ុន្តែបន្ទះឈីបនេះ គឺមានតម្លៃខ្ពស់ជាងមុន។ បន្ថែមពីនេះ សម្រាប់ម៉ូដែលស្តង់ដារ និងម៉ូដែល Plus ត្រូវបានគេរំពឹងថា គឺអាចនឹងមានការបំពាក់នូវបន្ទះឈីប MediaTek Dimensity 9400 ផងដែរ។ គួរបញ្ជាក់ថា ថ្មីៗនេះមានរបាយការណ៌ Sammy Fans បាននិយាយថា បន្ទះឈីប Snapdragon នឹងមានដាក់អោយប្រើប្រាស់នៅលើស្មាតហ្វូន Galaxy S25, S25+ និង S25 Ultra ផងដែរ។