យោងតាមព័ត៌មានជាច្រើនកន្លងមក បាននិយាយថា ស្មាតហ្វូនស៊េរីថ្មី Honor Magic 7 series នឹងក្លាយជាម៉ូដែលថ្មីមួយ ដែលមានការបំពាក់នូវមុខងារ AI ដ៏ខ្លាំងក្លាជាច្រើន ហើយក៏ត្រូវបានក្រុមហ៊ុននេះ បញ្ជាក់់ថា អាចនឹងយកឈ្នះទៅលើបច្ចេកវិទ្យា Apple Intelligence ថែមទៀតផង។ បើតាមនាយកប្រតិបត្តិម្នាក់នៅក្នុងចំណោមនាយកប្រតិបត្តិជាច្រើនរបស់ក្រុមហ៊ុននេះថ្មីៗនេះ ក៏បានចែករំលែកនូវព័ត៌មានលម្អិតអំពី AI Agent ដែលមានសមត្ថភាពខ្លាំងក្លាជាង និងអស្ចារ្យជាងបច្ចេកវិទ្យា AI ចេញពីក្រុមហ៊ុន Apple ផងដែរ។
លោក Zhao Ming ដែលជានាយកប្រតិបត្តិរបស់ក្រុមហ៊ុន Honor បាននិយាយថា ក្រុមហ៊ុនផលិតស្មាតហ្វូនជាច្រើននៅក្នុងឆ្នាំនេះ គឺផ្តោតទៅលើបច្ចេកវិទ្យា AI។ យ៉ាងណាមិញសម្រាប់ស្មាតហ្វូន Honor Magic 7 series គឺនឹងផ្តល់នូវបទពិសោធន៍ AI ដ៏អស្ចារ្យបំផុតសម្រាប់អ្នកប្រើប្រាស់។ នាយកប្រតិបត្តិរូបនេះបានបន្ថែមថា កាលពីខែមុននេះ ក្រុមហ៊ុន Apple ទើបតែបង្ហាញនូវបច្ចេកវិទ្យា Apple Intelligence AI របស់ខ្លួនដែលមានការផ្តោតទៅលើបច្ចេកវិទ្យា AI ដ៏អស្ចារ្យដូចគ្នា។
បច្ចេកវិទ្យា Apple Intelligence របស់ក្រុមហ៊ុនបច្ចេកវិទ្យាអាមេរិកាំងមួយនេះ ត្រូវបានគេមើលឃើញថា មានបញ្ហាមួយចំនួនផងដែរដោយសារតែបច្ចេកវិទ្យានេះអាចដំណើរការបានល្អ ជាមួយតែ System Apps ប៉ុណ្ណោះ។ សម្រាប់កម្មវិធីភាគីទី 3 គឺបានបង្កើតនូវបញ្ហាជារឿយៗ។ ដោយសារតែបញ្ហាជាច្រើននេះ គឺបានធ្វើអោយប៉ះពាល់ដល់អារម្មណ៍របស់អ្នកប្រើប្រាស់ជាច្រើនផងដែរ។ ប៉ុន្តែសម្រាប់រឿងនេះ គឺមិនមែនជាបញ្ហាទៅលើ Honor AI Agent ។ ជំនួយការនេះ មិនត្រឹមតែទ្រទ្រង់ទៅលើកម្មវិធីភាគីទី 3 នោះទេ ប៉ុន្តែវាក៏អាចដំណើរការឆ្លងកម្មវិធី (cross-app) ថែមទៀតផង។
ស្មាតហ្វូន Magic 7 series នេះ នឹងបំពាក់នូវបន្ទះឈីបចុងក្រោយបំផុតរបស់ក្រុមហ៊ុន Qualcomm ដែលនឹងនាំយកនូវសមត្ថភាព AI ទៅកាន់កម្រិតខ្ពស់។ គួរបញ្ជាក់ផងដែរថា ស្មាតហ្វូន Honor Magic 7 series នឹងបង្ហាញខ្លួនជាផ្លូវការណ៌នៅក្នុងខែនេះ។ ស្មាតហ្វូន Honor Magic 7 series នេះ នឹងមានមុខងារជាច្រើនដូចជា AI task management, AI image assistant និង AI car connection ផងដែរ។ អ្នកប្រើប្រាស់ជាច្រើនអាចធ្វើការប្រចាំថ្ងៃបានយ៉ាងរលូន ការផ្ញើសារ និងការគ្រប់គ្រងទៅលើផលិតផលឆ្លាតវៃតាមរយៈការបញ្ជាដោយសំឡេង (Voice Commands) ថែមទៀតផង៕