ក្រុមហ៊ុន Samsung ត្រូវបានគេរំពឹងថា នឹងមានការបង្ហាញចេញនូវស្មាតហ្វូនជំនាន់ថ្មី Galaxy S25 Series នៅក្នុងពេលប៉ុន្មានខែខាងមុខនេះ ដោយស្មាតហ្វូនស៊េរីថ្មីទាំង 3 នេះ រួមមានដូចជា Galaxy S25, S25 Plus និង S25 Ultra។ ស្មាតហ្វូនទាំងនេះ ត្រូវបានក្រុមហ៊ុនបញ្ជាក់ហើយថា នឹងប្រើប្រាស់នូវបន្ទះឈីប Snapdragon 8 Elite ដូចៗគ្នា។ ថ្មីៗនេះ មានការបែកធ្លាយជាច្រើន បានទម្លាយថា ស្មាតហ្វូនជំនាន់ថ្មីនេះ នឹងមានរ៉េមទំហំ 12GB ដែលមានការ upgrade ស្មាតហ្វូនជំនាន់មុននេះ មានការប្រើប្រាស់ទំហំ 8GB ប៉ុណ្ណោះ។ ការបែកធ្លាយនេះ បញ្ជាក់ទៀតថា ស្មាតហ្វូន Galaxy S25 series នេះនឹងមានតម្លៃដូចទៅនឹងស្មាតហ្វូន S24 អញ្ចឹង។
ជាមួយគ្នានេះ បើតាមការទម្លាយចេញពី Jukanlosreve វិញ បានអោយដឹងថា ស្មាតហ្វូនជំនាន់ថ្មី Galaxy S25, S25 Plus និង Galaxy S25 Ultra នឹងមានតម្លៃចាប់ផ្តើមដូចទៅនឹងស្មាតហ្វូនជំនាន់មុនអញ្ចឹង គឺចាប់ផ្តើមពី $799, $999 និង $1,299 ។ សម្រាប់តំបន់ផ្សេងទៀតនោះ តម្លៃរបស់ស្មាតហ្វូននេះគឺ £799/AU$1,399, £999/AU$1,699 និង £1,249/AU$2,199។សម្រាប់ទំហំម៉េមូរីរបស់ស្មាតហ្វូននេះ ប្រហែលជាមិនមានការផ្លាស់ប្តូរផងដែរ ដែលម៉ូដែល Standard មានទំហំ 128GB ខណៈពេលដែលម៉ូឌែល Plus និង Ultra គឺមានតម្លៃចាប់ផ្តើមពី 256GB។
ស្មាតហ្វូនថ្មីៗនេះនឹងដំណើរការនៅលើបន្ទះឈីប Snapdragon 8 Elite ហើយក៏នឹងនាំយកនូវបច្ចេកវិទ្យា AI ជាច្រើនមកជាមួយផងដែរ។ សូមជំរាបថា ក្រុមហ៊ុន Samsung បានផ្សព្វផ្សាយយ៉ាងខ្លាំងទៅលើ Galaxy AI ដែលជាផ្នែកមួយដ៏សំខាន់របស់ស្មាតហ្វូននេះ។ ជាមួយនឹងការបន្ថែមនូវរ៉េមដល់ទៅ 4GB នោះ នៅលើស្មាតហ្វូននេះ ក៏នឹងអាចពង្រឹងទៅលើបច្ចេកវិទ្យា AI ជាច្រើន។ ក្រុមហ៊ុន Google ក៏ប្រើប្រាស់យុទ្ធសាស្រ្តនេះ នៅលើស្មាតហ្វូន Pixel 9 series ផងដែរ។ ក្រុមហ៊ុន Google មានការបង្កើនរ៉េមដល់ទៅ 12GB នៅលើស្មាតហ្វូន Pixel 9 ខណៈពេលដែលស្មាតហ្វូន Pixel 9 Pro និង 9 Pro XL នឹងមានរ៉េមទំហំ 16GB។ គួរបញ្ជាក់ផងដែរថា ស្មាតហ្វូន Galaxy S25 series នេះ អាចនឹងបង្ហាញខ្លួនលឿនជាងការរំពឹងទុកផងដែរ៕
