ឆ្នាំ 2024 នេះ អាចនឹងក្លាយជាឆ្នាំដែលគួរអោយចាប់អារម្មណ៍បំផុតសម្រាប់អ្នកគាំទ្ររបស់ក្រុមហ៊ុន Samsung ប៉ុន្តែមិនទាន់បញ្ចប់នៅត្រឹមឆ្នាំនេះទេ ដោយថ្មីៗនេះ យើងបានទទួលនូវដំណឹងដ៏គួរអោយចាប់អារម្មណ៍ថា ក្រុមហ៊ុន Samsung អាចនឹងមានគម្រោងផែនការថ្មីទៀតនៅឆ្នាំក្រោយនេះ។ ដូចអ្វីដែលអ្នកបានលឺ ក្រុមហ៊ុន Samsung កំពុងតែអភិវឌ្ឍទៅលើស្មាតហ្វូន “Galaxy S25 Slim”។ មានពាក្យចចាមអារ៉ាមថ្មីមួយក៏បង្ហាញអំពីការប្រកាសបង្ហាញខ្លួនរបស់ស្មាតហ្វូននេះផងដែរ។
ស្មាតហ្វូនជំនាន់ថ្មី Galaxy S25 Slim នេះ អាចនឹងបង្ហាញខ្លួននៅក្នុងពេលណាមួយនៅក្នុងបន្ទប់អភិវឌ្ឍន៍របស់ក្រុមហ៊ុន Samsung ។ សូមជំរាបថា រឿងនេះ គឺមានពាក្យចចាមអារ៉ាមប្រហែលជា 1 សប្តាហ៍ហើយ ដោយលក្ខណៈសម្បតិ្តស្មាតហ្វូននេះ ក៏មានការបង្ហាញខ្លួននៅលើប្រព័ន្ធ IMEI database កាលពីម្សិលមិញនេះផងដែរ។ ដូច្នេះសម្រាប់ហ្វេនៗដែលមានបំណងចង់ទិញស្មាតហ្វូន Galaxy S25 Slim នៅដើមឆ្នាំក្រោយនេះ អ្នកប្រហែលជាត្រូវរង់ចាំសិន។
បើតាមការបញ្ជាក់ចេញពី @MaxJmb បានអោយដឹងថា ស្មាតហ្វូន Galaxy S25 Slim នឹងមិនទាន់បង្ហាញខ្លួនជាមួយនឹងស្មាតហ្វូនជំនាន់ថ្មី Galaxy S25 series នោះទេ។ ក្រុមហ៊ុន Samsung នឹងបង្ហាញនូវស្មាតហ្វូន Galaxy S25, S25+ និង S25 Ultra នៅដើមឆ្នាំក្រោយនេះ ប៉ុន្តែស្មាតហ្វូន Slim version អាចនឹងបង្ហាញខ្លួននៅចុងឆ្នាំក្រោយនេះ។ Max Jambor បាននិយាយថា ស្មាតហ្វូន Galaxy S25 Slim នឹងមិនទាន់ជំនួសស្មាតហ្វូន Fan Edition នោះទេ។
សូមជំរាបថា ពាក្យចចាមចុងក្រោនេះ បានបញ្ជាក់ថា ក្រុមហ៊ុន Samsung នឹងមានការបង្ហាញនូវស្មាតហ្វូន Galaxy S25 versions ប្រហែលជា 5 ម៉ូដែលនៅឆ្នាំក្រោយនេះ។ សម្រាប់ឆ្នាំ 2025 ខាងមុខនេះ អាចនឹងក្លាយជាឆ្នាំសម្រាប់វត្តមានរបស់ស្មាតហ្វូន Galaxy S series។ ស្មាតហ្វូន Galaxy S25 Slim នឹងមានកាមេរ៉ា Ultra-grade 200MP ដ៏ខ្លាំងក្លាថែមទៀតផង៕
