កាលពីសប្តាហ៍មុននេះ ក្រុមហ៊ុន Honor ទើបតែបង្ហាញនូវស្មាតហ្វូន Magic 7 series នៅក្នុងប្រទេសចិន ដែលម៉ូដែលនេះគឺស្មាតហ្វូនជាជំនាន់ថ្មីនៃម៉ូដែល Magic 6 series ដែលបង្ហាញវត្តមានកាលពីឆ្នាំមុន។ ស្មាតហ្វូនស៊េរីថ្មីនេះ គឺមានការបំពាក់នូវមុខងារ AI រួមនិងបន្ទះឈីប Snapdragon 8 Elite ដែលជាឈីបខ្លាំង នឹងមានការ upgrade ខ្ពស់បំផុតសម្រាប់ប្រើប្រាស់នៅលើស្មាតហ្វូនថ្នាក់ប្រណិត។
នៅពេលនេះ ស្មាតហ្វូនជំនាន់ថ្មីនេះ គឺមានការពេញនិយមខ្លាំងមែនទែននៅលើទីផ្សារប្រទេសចិន។ ក្រុមហ៊ុន Honor ប្រកាសថា សម្រាប់ការលក់ថ្ងៃដំបូងទៅលើស្មាតហ្វូនស៊េរីថ្មី Magic 7 series នេះ គឺបានបំបែកទៅលើកំណត់ត្រាថ្មីនៅក្នុងប្រវត្តិសាស្រ្ត Honor ដែលលក់នាពេលកន្លងមក។ ស្មាតហ្វូនថ្មីនេះ គឺបានដាក់លក់ជាផ្លូវការណ៌កាលពីថ្ងៃទី 8 ខែវិច្ឆិកាកន្លងទៅនេះ ដោយភ្លាមៗទទួលបាននូវការចាប់អារម្មណ៍ច្រើនពីអ្នកប្រើប្រាស់នៅក្នុងស្រុក។
ស្មាតហ្វូនជំនាន់ថ្មី Honor Magic 7 នេះ គឺមានចំនួន 5 ពណ៌ សម្រាប់ធ្វើការជ្រើសរើសរួមមានដូចជា Sunrise Gold, Moon Shadow Grey, Snowy White, Sky Blue និង Velvet Black។ សម្រាប់ស្មាតហ្វូន Honor Magic 7 Pro វិញគឺមាន 4 ពណ៌រួមមានដូចជា Moon Shadow Grey, Snowy White, Sky Blue និង Velvet Black ។ ស្មាតហ្វូននេះ មានតម្លៃចាប់ពី 4,499 យ៉ន់ ($626) រហូតដល់ទៅ 5,499 យ៉ន់($765) សម្រាប់ម៉ូដែល Satellite ខណៈពេលដែលស្មាតហ្វូនម៉ូដែល Pro មានតម្លៃ 5,699 យ៉ន់($793) និងម៉ូដែល satellite មានតម្លៃ 6,699 យ៉ន់($933) ។
បើមើលទៅលើលក្ខណៈសម្បត្តិរបស់ស្មាតហ្វូននេះ ស្មាតហ្វូន Magic 7 នេះ មានអេក្រង់ទំហំ 6.78-អ៊ីង flat OLED display ខណៈពេលដែលម៉ូដែល Pro មានអេក្រង់ទំហំ 6.8-អ៊ីង Quad-Curved OLED ហើយអេក្រង់ស្មាតហ្វូនទាំងពីរនេះ គឺមានទ្រទ្រង់នូវ 1Hz-120Hz LTPO adaptive refresh rates រួមជាមួយនិងពន្លឺអេក្រង់ដល់ទៅ HDR 5000nits។ ស្មាតហ្វូនថ្មីនេះ នឹងមានការបំពាក់នូវបន្ទះឈីប Snapdragon 8 Elite ជាមួយនឹងក្រាហ្វិកកាត Adreno 830 GPU ដែលផ្តល់នូវភាពខ្លាំងក្លាជាពិសេសនៅក្នុងការលេងហ្គេម និងប្រព័ន្ធត្រជាក់ liquid cooling system របស់ក្រុមហ៊ុន Honor ។
ស្មាតហ្វូននេះ ដំណើរការនូវ MagicOS 9.0 ផ្អែកនៅលើ Android 15 ជាមួយនឹងមុខងារ AI ដូចជា YOYO Smart Assistant និងការពង្រឹងទៅលើឯកជនភាពថែមទៀត។ ស្មាតហ្វូន Magic 7 មានកាមេរ៉ាខាងក្រោយទំហំ 50MP ចំនួន 3 គ្រាប់ ខណៈពេលដែលម៉ូដែល Pro មានការតម្លើងនូវកាមេរ៉ាទំហំ 200MP periscope telephoto lens ទ្រទ្រង់នូវ 100x zoom។ ស្មាតហ្វូនទាំងពីរនេះក៏ទ្រទ្រង់ទៅលើមុខងារ AI ជាមួយនឹងកាមេរ៉ាខាងមុខទំហំ 50MP ហើយម៉ូឌែល Pro គឺមាន ToF sensor 3D facial recognition ផងដែរ។
ស្មាតហ្វូន Magic 7 នេះមានថាមពលថ្មទំហំ 5650mAh ខណៈពេលដែលម៉ូដែល Pro មានថាមពលថ្មទំហំ 5850mAh។ ស្មាតហ្វូនទាំងពីរនេះ មានការទ្រទ្រង់នូវ 100W wired និងបច្ចេកវិទ្យា 80W wireless charging និងបច្ចេកវិទ្យាថាមពលថ្ម Qinghai Lake របស់ក្រុមហ៊ុន Honor ក្នុងការពង្រឹងថាមពលថ្មបានយូរថែមទៀតផង។ បន្ថែមពីនេះទៀតនោះ ស្មាតហ្វូននេះ ក៏មានប្រព៌ន្ធការពារទឹក និងធូលី IP68/69 ratings, ប្រព័ន្ធស្កែនម្រាមដៃ 3D ultrasonic fingerprint sensors ហើយនិងបច្ចេកវិទ្យា 5G, Wi-Fi 7 ក៏ដូចជាប្រព័ន្ធផ្កាយរណប Satellite messaging ហើយនិងធន់ទៅនឹងការធ្លាក់ដល់ទៅ 10x ទៀតផង៕
