កំពូលស្មាតហ្វូនជំនាន់ថ្មី Samsung Galaxy S25 Ultra ដែលត្រៀមបង្ហាញវត្តមាននៅដើមឆ្នាំ 2025 ខាងមុខនេះ គឺទទួលបានការចាប់អារម្មណ៍ខ្លាំង ដោយកំពូលស្មាតហ្វូនជំនាន់ថ្មីនេះនឹងមានការបង្កើននូវមុខងារប្រើប្រាស់ថ្មី និងធ្វើការកែលម្អទៅលើផ្នែករឹងកាន់តែខ្ពស់ជាងជំនាន់មុន។ ស្របពេលជាមួយគ្នានេះ បើតាមការលេចលឺព័ត៌មានថ្មីចុងក្រោយនេះ បានបង្ហើបថា Galaxy S25 Ultra នឹងកើនតម្លៃខ្ពស់ជាង Galaxy S24 Ultra បច្ចុប្បន្នប្រមាណជាជាង $100។
យោងតាមគណនីទម្លាយព័ត៌មានល្បីឈ្មោះក្នុងប្រទេសចិនឈ គឺ Digital Chat Station បាននិយាយថា Samsung Galaxy S25 Ultra នឹងកើនតម្លៃខ្ពស់ជាងតម្លៃ Galaxy S24 Ultra ប្រមាណ $110 ការកើនតម្លៃនេះ ក៏ព្រោះតែកត្តាតម្លៃសមាសធាតុផលិត (BoM) មានតម្លៃថ្លៃ។
Samsung Galaxy S25 Ultra នឹងមានតម្លៃចាប់ពីខ្ទង់ $1,299.99 ដល់ $1,400 នៅក្នុងទីផ្សារមួយចំនួន។ ដែលនឹងធ្វើឲ្យ Galaxy S25 Ultra ក្លាយជាស្មាតហ្វូនដែលមានតម្លៃថ្លៃបើធៀបនឹងគូប្រជែងដូចជា iPhone16 Pro Max ដែលមានតម្លៃចាប់ពីខ្ទង់ $1,199 និង Google Pixel 9 Pro XL មានតម្លៃចាប់ពីខ្ទង់ $10,99។ កត្តាកើនតម្លៃរបស់ Galaxy S25 Ultra ត្រូវបានគេដឹងថា គឺការប្រើប្រាស់បន្ទះឈីប Qualcomm Snapdragon 8 Elite ដែលមានសមត្ថភាពខ្ពស់ជាងមុនប្រមាណ 25% ទៅ 30% ដែលត្រូវបានគេដឹងថា អាចនឹងមានតម្លៃប្រមាណ $200 ក្នុងមួយដើម។
លើសពីនេះ S25 Ultra ត្រូវបានចចាមអារ៉ាមនិយាយថា នឹងបំពាក់បច្ចេកវិទ្យាបន្ទះអេក្រង់ថ្មី M14 Display ដែលត្រូវបានរចនាឡើងដើម្បីដោះស្រាយបញ្ហា 'grainy display' ដែលឃើញនៅក្នុងម៉ូដែលមុនៗ ខណៈពេលដែលផ្តល់ពន្លឺកាន់តែខ្ពស់ជាងមុន។ ផ្ទុយទៅវិញក៏មានរបាយការណ៍និយាយថា Samsung អាចនឹងបន្តប្រើនឹងបន្ទះអេក្រង់ M13 Display ដែលប្រើនៅលើ Galaxy S24 Ultra បច្ចុប្បន្ន ដើម្បីកាត់បន្ថយតម្លៃ៕
