Samsung ត្រៀមប្រកាសចេញស្មាតហ្វូនកំពូលជំនាន់ថ្មី Galaxy S25 Series ដែលមាន Galaxy S25, S25+ និង S25 Ultra នៅដើមឆ្នាំក្រោយនេះ។ ប៉ុន្តែ មាននៅមុនថ្ងៃប្រកាសចេញមកដល់ មានការទម្លាយចេញនូវលក្ខណៈសម្បត្តិរបស់ស្មាតហ្វូនជំនាន់ថ្មីទាំងនេះជាហូរហែរមិនដាច់ឡើយ។ បើតាមដំណឹងចុងក្រោយ និងនៅលើបញ្ចីរបស់ស្ថាប័ន FCC បានបញ្ជាក់ថា កំពូលស្មាតហ្វូនត្រកូល Galaxy S ជំនាន់ថ្មីនេះ នឹងបង្ហាញវត្តមានផ្លូវការណ៍នៅក្នុងខែមករា ឆ្នាំ 2025 ដែលជាពេលដូចគ្នានៃការបង្ហាញវត្តមានរបស់ត្រកូល Galaxy S24 កាលពីដើមឆ្នាំនេះដែរ។
ជាមួយគ្នានេះ បើតាមដំណឹងរស៊ើបជាច្រើនបាននិយាយថា នៅឆ្នាំក្រោយនេះ Samsung ក៏នឹងមានការណែនាំម៉ូដែលថ្មីមួយបន្ថែមទៀតផងដែរ ដែលមានឈ្មោះថា Galaxy S25 Slim ស្របពេលដែលលេចលឺដំណឹងថា Apple ក៏នឹងមានការប្រកាសចេញ iPhone ម៉ូដែលថ្មី មានឈ្មោះថា iPhone 17 Slim ឬ 17 Air នៅឆ្នាំក្រោយនេះដូចគ្នា។ ដោយឡែកងាកមកចាប់អារម្មណ៍នៅលើព័ត៌មានរបស់ FCC វិញម្តង ដែលបានបង្ហាញចេញនូវបច្ចេកវិទ្យាសាកភ្លើងរបស់បងប្អូនកំពូលស្មាតហ្វូនជំនាន់ថ្មី Galaxy S25 Series។
នៅលើបញ្ចីរបស់ FCC បង្ហាញថា Galaxy S25 Series គឺមានលេខកូដ SM-931U, SM-936U, និង SM-938U ហើយម៉ូដែលទាំងបី គឺគាំទ្រនូវប្រព័ន្ធសេវា 5G, Bluetooth, NFC, GNSS, និង dual band Wi-Fi។ បន្ថែមពីនេះ នៅលើបញ្ចីក៏បានបង្ហាញថា ម៉ូដែលប្អូន Galaxy S25 គឺប្រើប្រាស់នូវឆ្នាំងសាកដែលមានលេខកូដ EP-TA800 ដែលបញ្ជាក់ម៉ូដែលនេះ គឺគាំទ្រកំលាំងសាកភ្លើង 25W ដូចជំនាន់ Galaxy S24 ដដែល។ នេះបានបង្ហាញថា Samsung នៅតែដើរយឺតជាងក្រុមហ៊ុនដៃគូប្រកូតរបស់ខ្លួនទៅលើបច្ចេកវិទ្យាសាកថ្មស្មាតហ្វូន សូម្បីតែ Apple ក៏ដើរលឿនជាងផងដែរ។
ហើយសម្រាប់ Galaxy S25+ និង Galaxy S25 Ultra វិញ នឹងគាំទ្របច្ចេកវិទ្យាសាកភ្លើងជាមួយឆ្នាំងសាកកំលាំង 45W។ ទន្ទឹងនឹងនេះ Samsung ត្រូវបានគេរាយការណ៍ថា ក៏នឹងមានការទម្លាក់កំលាំងសាកភ្លើង Wireless charging ផងដែរ ដោយ Galaxy S25 នឹងគាំទ្រកំលាំងសាកភ្លើង Wireless Charging ត្រឹម 9W ដែលបន្ថយពី 15W នៅលើជំនាន់មុន។ ទោះជាយ៉ាងណា នេះគ្រាន់តែជាដំណឹងបឋមប៉ុណ្ណោះ សម្រាប់គុណសម្បត្តិជាក់លាក់យ៉ាងណាយើងមានតែរងចាំអ៊ុតមើលទាំងអស់គ្នានៅថ្ងៃនៃការបង្ហាញខ្លួនរបស់កំពូលស្មាតហ្វូនជំនាន់ថ្មី Galaxy S25 Series នៅដើមឆ្នាំក្រោយតែប៉ុណ្ណោះ៕
