នៅក្នុងប៉ុន្មានសប្តាហ៍នេះ ស្មាតហ្វូន Galaxy S25 Slim ស្ថិតនៅក្នុងការសន្ទនាជាច្រើន ដែលមតិខ្លះបាននិយាយថា ម៉ូដែលនេះ នឹងក្លាយជាស្មាតហ្វូនទី 4 នៃត្រកូលស្មាតហ្វូន Galaxy S25 Series ថែមទៀតផង។ នៅក្នុងពេលនេះ យើងក៏បានលឺដំនឹងជាច្រើនទាក់ទងជាមួយនិងស្មាតហ្វូនថ្មីនេះផងដែរ។ សម្រាប់ Galaxy S25 Slim គឺមានភាពខុសប្លែកពីស្មាតហ្វូន Galaxy Z Fold Special Edition ដោយស្មាតហ្វូននេះ នឹងមានការបង្ហាញខ្លួននៅក្នុងទីផ្សារសកលផងដែរ។ ស្មាតហ្វូននេះនឹងមានលេខកូដ SM-S937B ហើយពាក្យ “B” នេះគឺសម្រាប់ស្មាតហ្វូន global version ។
បើមើលទៅលើស្មាតហ្វូន Galaxy S25, S25+ និង S25 Ultra គឺមានលេខកូដ SM-S931x, SM-S936x និង SM-S938x ហើយក្រុមហ៊ុន Samsung នឹងមិនប្រើប្រាស់នូវលេខកូដនេះ នៅលើស្មាតហ្វូន Series នេះទេ។ នៅក្នុងសហរដ្ឋអាមេរិក លេខកូដ “x” នឹងជំនួសដោយ “U” ហើយនៅក្នុងកូរ៉េគឺប្រើប្រាស់នូវ “N” ។ ពេលនេះ នៅមិនទាន់ច្បាស់នោះទេថា ក្រុមហ៊ុន Samsung មានគម្រោងក្នុងការប្រកាសបង្ហាញនូវស្មាតហ្វូនជំនាន់ទី 4 នៃត្រកូលស្មាតហ្វូន Galaxy S25 នៅឡើយទេ។
ប៉ុន្តែយោងតាមពាក្យចចាមអារ៉ាមជាច្រើននាពេលកន្លងមកធ្លាបបានបញ្ជាក់ថា ស្មាតហ្វូនជំនាន់ថ្មីនេះ អាចនឹងបង្ហាញខ្លួនជាមួយនឹងស្មាតហ្វូន Galaxy S25, S25+ និង S25 Ultra។ ថ្មីៗនេះ ក៏មានពាក្យចចាមអារ៉ាមអំពីស្មាតហ្វូន Samsung's Fan Edition ដែលជាស្មាតហ្វូនមួយស្ថិតនៅក្នុងចន្លោះម៉ូឌែល S25+ និង S25 Ultra ផងដែរ។ ស្មាតហ្វូននេះ នឹងមានកាមេរ៉ាគោលទំហំ 200MP និងអមដោយកាមេរ៉ា 50MP ultrawide និង 50MP 3.5x zoom នៅខាងក្រោយទៀតផង៕
