នៅពេលនេះ ក្រុមហ៊ុន Honor ត្រូវបានគេមើលឃើញថា បានទទួលបាននូវចំណាត់ថ្នាក់ល្អសម្រាប់ទីផ្សារនៅក្នុងប្រទេសចិន និងទីផ្សារសកល។ បន្ទាប់ពីការបង្ហាញនូវផលិតផល Flagship Honor ជាច្រើននៅក្នុងឆ្នាំនេះ ការលក់សម្រាប់ទីផ្សារសកលរបស់ក្រុមហ៊ុននេះ គឺមានការកើនឡើង 50% នៅក្នុងខែធ្នូ ឆ្នាំ 2024 កន្លងទៅនេះ។ សម្រាប់ប្រាក់ចំណេញរបស់ក្រុមហ៊ុននេះ ត្រូវបានគេជឿជាក់ថា អាចនឹងមានកើនឡើងបន្ថែមទៀតនៅក្នុងឆ្នាំ 2025 នេះ។
នៅថ្ងៃទី 31 ខែធ្នូឆ្នាំ 2024 នេះ លោក Zhao Ming នាយកប្រតិបត្តិរបស់ក្រុមហ៊ុន Honor បានថ្លែងនូវសន្ទរកនៅលើទំព័រ Weibo គាត់ ដោយបានថ្លែងអំណរគុណដល់អតិថិជនជាច្រើនរបស់ខ្លួនសម្រាប់ការគាំទ្រឥតឈប់ឈរ ដែលធ្វើអោយក្រុមហ៊ុននេះ អាចទប់ទល់ទៅនឹងការប្រកួតប្រជែងទីផ្សារបាន និងសម្រេចបាននូវវឌ្ឍនភាពសមិទ្ធិផលជាច្រើន។ លោកនាយកប្រតិបត្តិនេះបន្ថែមថា ក្រុមហ៊ុន Honor នឹងបន្តក្នុងការលើកកម្ពស់ទៅលើផលិតផល AI និងយុទ្ធសាស្រ្តថ្មីៗជាច្រើនទៀតដើម្បីរក្សានូវលទ្ធផលវិជ្ជមាន និងកំនើនប្រកបដោយនិរន្តរភាពនៃអាជីវកម្មសកលរបស់ក្រុមហ៊ុននេះ។
ចំពេលដែលមានការកើនឡើងនៃសមិទ្ធិផលនេះ ក្រុមហ៊ុន Hnor ត្រូវបានគេរាយការណ៍ថា ការលក់ជាសកលរបស់ក្រុមហ៊ុននេះគឺមានការកើនឡើងដល់ទៅ 50% សម្រាប់ខែធ្នូ ឆ្នាំ 2024 នេះ។ ក្រុមហ៊ុននេះក៏រកប្រាក់ចំណេញបានច្រើននៅក្នុងទីផ្សារជាច្រើននៅសកលផងដែរ។ វាហាក់ដូចជា ពេលនេះ ក្រុមហ៊ុន Honor បានក្លាយជាក្រុមហ៊ុនអន្តរជាតិហើយ។
លោក Zhao Ming និយាយថា “នៅថ្ងៃចុងក្រោយសម្រាប់ឆ្នាំ 2024 នេះ ខ្ញុំមានដំណឹងល្អដើម្បីប្រាប់ទៅអ្នកទាំងអស់គ្នា។
ការលក់សម្រាប់ទីផ្សារសកលរបស់ក្រុមហ៊ុន Honor គឺមានការកើនឡើងច្រើនជាង 50% នៅក្នុងខែធ្នូនេះ ហើយវាក៏បង្កើតនូវប្រាក់ចំណេញច្រើនដែលនេះពិតជាបង្ហាញថា ក្រុមហ៊ុន Honor គឺពិតជាក្លាយជាក្រុមហ៊ុនសហគ្រាសអន្តរជាតិ!” លោក Zhao បន្ថែមថា វាមានផ្នែកជាច្រើនដែលបានជួយអោយក្រុមហ៊ុនទទួលបាននូវជោគជ័យ។ ក្រុមហ៊ុននេះបានប្រើប្រាស់នូវបច្ចេកវិទ្យា AI និងការកែប្រែទៅលើ hardware/OS សម្រាប់រយៈពេល 8 ឆ្នាំ។ ការបញ្ចេញនូវ MagicOS 9.0 ផ្អែកនៅលើ Android 15 ដំណើរការនូវ AI និងបើកទំព័រថ្មីនៃ OS នេះ។
ស្មាតហ្វូនបត់បាន Magic V3 ក៏ទទួលបាននូវការពេញនិយមនៅក្នុងទីផ្សារសកលផងដែរ ហើយវាគឺមានចំនែកទីផ្សារចំនួន 21% សម្រាប់ទីផ្សារស្មាតហ្វូនបត់បាននៅក្នុងប្រទេសចិន។ ក្រុមហ៊ុន Honor ក៏បានយកឈ្នះក្រុមហ៊ុន Samsung ជាលើកដំបូងបំផុត នៅឆ្នាំនេះ នៅក្នុងអ៊ឺរ៉ុបខាងលិច ដោយសារតែស្មាតហ្វូនប្រកបដោយភាពច្នៃប្រឌិត និងផលិតផលជាច្រើនដ៏សម្បូរបែប។ ក្រៅពីស្មាតហ្វូនក្រុមហ៊ុននេះ ក៏ទទួលបាននូវជោគជ័យនៅក្នុងផ្នែកផ្សេងទៀតដូចជាកុំព្យូទ័រ Honor PC ផងដែរ៕
