នៅថ្ងៃទី 7 កុម្ភៈ ក្រុមហ៊ុន Chery បានប្រកាសថា រថយន្ត SUV ប្រណិតម៉ូដែល Exeed VX ស៊េរីថ្មីដំបូងរបស់ខ្លួន ដែលដំណោះការដោយប្រព័ន្ធ C-DM Plug-in-hybrid ត្រូវបានចាប់ផ្តើមសង្វាក់ផលិតទ្រង់ទ្រាយធំជាផ្លូវការណ៍ហើយ។ សម្រាប់ការដាក់ឲ្យធ្វើការបញ្ជាទិញមុនសម្រាប់ Chery Exeed VX ត្រូវបានគេដឹងថានឹងធ្វើឡើងឆាប់ៗនេះ ហើយការបង្ហាញវត្តមានជាផ្លូវការណ៍អាចនឹងត្រូវធ្វើឡើងនៅក្នុងខែមីនាខាងមុខនេះ។ Chery Exeed VX នឹងក្លាយជាគូប្រជែងទីផ្សាររថយន្ត Plug-in-hybrid SUV ជាមួយនឹង Wey Lanshan, Li L8, និង Aito M7។
សម្រាប់ Chery Exeed VX ដែលប្រើម៉ាស៊ីនសាំងសុទ្ធ គឺមានតម្លៃចាប់ពីខ្ទង់ $26,600 ដល់ $32,100។ Exeed VX គឺជាប្រភេទរថយន្ត Medium-to-Large SUV ដែលមានបណ្តោយ 5,010mm/ទទឹង 1,940mm/ កំពស់ 1,800mm និងគម្លាតចន្លោះកង់មុខទៅកង់ក្រោយ 2,900mm ដែលវែងជាង 40mm និងខ្ពស់ជាង 8mm ធៀបនឹងម៉ូដែលប្រើម៉ាស៊ីនសាំង។ រថយន្ត SUV នេះ មានទំងន់សរុប 2,280kg ជាមួយមានជម្រើស 6 កៅអី និង 7 កៅអី។
Chery Exeed VX C-DM នៅតែរក្សាការរចនារូបរាងខាងក្រៅដូចគ្នានឹងម៉ូដែលប្រើសាំងដែរ។ រថយន្តនេះផលិតឡើងដោយឈរនៅលើគ្រោងឆ្អឹង M3X hybrid platform ជាមួយនឹងប្រព័ន្ធដំណើរការ Four-wheel-drive។
សម្រាប់ម៉ូដែល Exeed VX C-DM ត្រូវបានគេដឹងថា ប្រើប្រាស់ម៉ាស៊ីនទំហំ 1.5T និងភ្ជាប់ដំណើរការជាមួយប្រព័ន្ធម៉ូទ័រអគ្គិសនីចំនួនពីរ “Dual electric motor” ព្រមទាំងប្រើកញ្ចប់ថ្មទំហំ 34.46 kWh ប្រភេទ ternary lithium battery pack។ សម្រាប់ម៉ាស៊ីន 1.5T គឺអាចផលិតកំលាំងបាន 115kW ឬស្មើរ 154 សេះ ខណៈម៉ូទ័រអគ្គិសនីទាំងពីរមានកំលាំងសរុបដល់ 340kW ឬស្មើរ 456 សេះ។
បើតាមការបញ្ជាក់ពីស្ថាប័ន CLTC បានឲ្យដឹងថា កញ្ចប់ថ្មរបស់ Exeed VX C-DM សាកភ្លើងមួយពេញម្តងអាចបើកបានចម្ងាយ 143km ដោយប្រើថាមពលអគ្គិសនីសុទ្ធ និងបានចម្ងាយដល់ 1,300km នៅពេលចាក់សាំង និងសាកភ្លើងមួយពេញម្តង។ សម្រាប់ការជាន់សន្ទុះល្បឿនវិញ គឺពី 0 ទៅ 100km/h ចាយពេលប្រមាណ 5 វិនាទី ហើយសម្រាប់កម្រិតស៊ីសាំងរបស់ម៉ាស៊ីន 1.5T វិញ គឺ 1.5L/100km៕
