ក្រុមហ៊ុន Apple ត្រូវបានគេរាយការណ៍ថា បាននឹងកំពុងតែធ្វើការនៅលើថេប្លេតជំនាន់ថ្មី iPad Pro ដែលមានអេក្រង់បត់បាន ហើយសម្រាប់គំរូបច្ចុប្បន្នថេប្លេតនេះ គឺមានការបញ្ជាក់ពីប្រើប្រាស់នូវបច្ចេកវិទ្យា Face ID ក្រោមអេក្រង់។ យោងតាមការបែកធ្លាយមួយចេញពីអ្នកទម្លាយ Digital Chat Station នៅលើ Weibo បានបង្ហាញថា គំរូរបស់អេក្រង់បត់បាននេះ គឺមានទំហំ 18.8-អ៊ីង និងការបំពាក់នូវ “metal superstructure lens” ដែលមានបច្ចេកវិទ្យា Face ID នៅក្រោមអេក្រង់ថែមទៀតផង។ គួរបញ្ជាក់ថា ក្រុមហ៊ុន Apple ក៏ធ្លាប់ត្រូវបានគេចំអកទៅលើការផ្លាស់ប្តូរពី notch ទៅកាន់ទម្រង់ pill-shaped ផងដែរដោយ នៅលើអេក្រង់ គឺពិតជាសំខាន់ណាស់សម្រាប់បច្ចេកវិទ្យា Face ID។
ជាមួយនឹងបច្ចេកវិទ្យាក្រោមអេក្រង់នេះ ថេប្លេត iPad អេក្រង់បត់បាននេះ នឹងផ្តល់នូវបទពិសោធន៍នៃការប្រើប្រាស់កាន់តែអស្ចារ្យ។ សម្រាប់មុខងារថ្មីនេះ គឺជាការអភិវឌ្ឍជាលើកដំបូងបំផុតទៅលើផលិតផលរបស់ Apple ដែលប្រើប្រាស់នូវបច្ចេកវិទ្យា Face ID ក្រោមអេក្រង់។ ក្រុមហ៊ុនវិភាគ DSCC បានព្យាករណ៍ថា ក្រុមហ៊ុន Apple នឹងបង្ហាញនូវ iPad Pro អេក្រង់ទំហំ 18.8-អ៊ីង ដែលអាចបត់បាន និងមានការគាំទ្រដោយអេក្រង់ OLED នេះ នៅក្នុងឆ្នាំ 2027 នេះ។ ទន្ទឹមនឹងនេះផងដែរ អ្នកវិភាគ Ming-Chi Kuo បានបញ្ជាក់ថា ក្រុមហ៊ុន LG នឹងចាប់ផ្តើមការផលិតទ្រង់ទ្រាយធំទៅលើអេក្រង់នេះសម្រាប់ Macbook ដែលមានអេក្រង់បត់បានទំហំ 20.2-អ៊ីង ឬ 18.8-អ៊ីង នៅចុងឆ្នាំ 2025 នេះ។
ទាក់ទងនឹងព័ត៌មាននេះដែរ កាសែត The Wall Street Journal បានរាយការណ៍ថា ក្រុមហ៊ុន Apple នឹងធ្វើការនៅលើឧបករណ៍ដែលមានអេក្រង់បត់បានដែលមានមុខងារដូចទៅនឹងកុំព្យូទ័រអញ្ចឹង។ ហើយនៅពេលដែលបើកមានទំហំអេក្រង់ដល់ទៅ 19-អ៊ីង។ លោក Mark Gurman របស់ស្ថាប័ន Bloomberg បានបន្ថែមថា ក្រុមហ៊ុន Apple នឹងអភិវឌ្ឍទៅលើ iPad ដែលមានអេក្រង់បត់បានដ៏ធំដែលមិនមានស្នាមបត់នោះទេ។ ក្រៅពី iPad នេះ ក្រុមហ៊ុន Apple ក៏ធ្វើការនៅលើ iPhone អេក្រង់បត់បានទម្រង់ book-style ដែលនឹងបង្ហាញខ្លួននៅឆ្នាំក្រោយនេះ៕
