Huawei Pura 90 Series នឹងបង្ហាញខ្លួននៅខែក្រោយ ជាមួយនិង Wide Foldable ជំនាន់ទី 2 យោងតាមព័ត៌មានថ្មីនៅថ្ងៃនេះ បានបង្ហើបថា ស្មាតហ្វូនស៊េរីថ្មី Huawei Pura 90 Series រួមជាមួយនិងស្មាតហ្វូនអេក្រង់បត់បានប្រភេទ (wide foldable) ជំនាន់ទី 2 របស់ក្រុមហ៊ុនបច្ចេកវិទ្យាយក្សចិនមួយនេះ នឹងមានការបង្ហាញខ្លួននៅខែមេសាខាងមុខនេះហើយ។ ផ្អែកតាមអ្នកទម្លាយ Digital Chat Station ដែលជាប្រភពជឿជាក់បាននោះ បញ្ជាក់អោយដឹងដែរថា ក្រុមហ៊ុន Huawei គឺបានត្រៀមបញ្ចេញនូវស្មាតហ្វូនត្រកូល Pura ជំនាន់ថ្មីហើយ។ បន្ទាប់ពីព្រឹត្តិការណ៌សម្ពោធនេះ ក្រុមហ៊ុន Huawei ក៏បានត្រៀមបញ្ចេញ Pura X2 ដូចគ្នា ដោយស្មាតហ្វូនអេក្រង់បត់បានជំនាន់ថ្មីនេះ នឹងបង្ហាញខ្លួនជាផ្លូវការនៅក្នុងប៉ុន្មានថ្ងៃខាងមុខនេះ។

អ្នកទម្លាយរូបនេះ បាននិយាយថា ស្មាតហ្វូនជំនាន់ថ្មីទាំងពីរម៉ូដែលរួមមានដូចជា Huawei Pura 90 Series រួមនិងស្មាតហ្វូនអេក្រង់បត់បានជំនាន់ថ្មី widescreen foldable នេះ គឺអាចនឹងបង្ហាញខ្លួននៅក្នុងខែមេសានេះហើយ។ ស្មាតហ្វូន Pura X2 នេះ នឹងបន្តក្លាយជាស្មាតហ្វូន wide-folding អេក្រង់ធំដំបូងបំផុតនៅក្នុងឧស្សាហកម្មនេះរបស់ក្រុមហ៊ុន Huawei។ ថ្មីៗនេះ ក្រុមហ៊ុន Huawei ក៏ទើបតែចុះបញ្ជីស្មាតហ្វូន Pura 90 series ផងដែរ ដោយម៉ូដែលនេះ នឹងក្លាយជាស្មាតហ្វូនលំដាប់ Flagship ទី 2 ដែលមានសិនស័រទំហំ 200MP ថែមទៀតផង។

ជាមួយគ្នានេះ នៅរបាយការណ៍មុននេះ ក៏ធ្លាប់បានបញ្ជាក់ថា ស្មាតហ្វូនអេក្រង់បត់បាន Pura X2 ថ្មីនេះ មានកូដថា Hope ហើយក៏មានពណ៌ថ្មីផងដែរ។ អ្នកទម្លាយរូបនេះ បានបន្ថែមថា ស្មាតហ្វូន Pura 90 Series នឹងបំពាក់នូវកាមេរ៉ា Zoom មួយគ្រាប់ប៉ុណ្ណោះ ហើយក្រុមហ៊ុន Huawei នៅតែរក្សានូវកាមេរ៉ា “dual periscope” ផ្តាច់មុខសម្រាប់ស្មាតហ្វូនត្រកូល Mate របស់ខ្លួនដដែល៕