ក្រុមហ៊ុន Samsung Electronics ទើបតែប្រកាសជាផ្លូវការនូវ Galaxy Tab S11 Ultra Pro Keyboard ដែលជា Accessory ថ្មី ដែលមានការឌីស្សាញឡើង សម្រាប់ប្រែក្លាយនូវថេប្លេត Galaxy Tab S11 Ultra របស់អ្នកអោយទៅជាកុំព្យូទ័រឡេបថប ដែលមានសមត្ថភាពពេញលេញខ្លាំងក្លាក្នុងការប្រើប្រាស់។ សម្រាប់ Keyboard នេះ បានចាប់ផ្តើមដំណើរការនៅក្នុងទីផ្សារមួយចំនួនដែលបានជ្រើសរើសជាច្រើនដែលក្នុងនោះ ក៏មានហុងកុងផងដែរ។ Keyboard នេះ គឺផ្តោតទៅលើភាពងាយស្រួលក្នុងការចល័ត ភាពធន់ និងការពង្រឹងទៅលើភាពងាយស្រួលក្នុងការប្រើប្រាស់។

និយាយពី Galaxy Tab S11 Ultra Pro Keyboard នេះ គឺមានតួខ្លួនអាលុយមីញ៉ូមស្តើង ប្រណិតភាព និងស្រាលក្នុងការប្រើប្រាស់។ ក្រុមហ៊ុន Samsung បានប្រើប្រាស់នូវគន្លឺះលោហៈ Metal Hinge ដែលអនុញ្ញាតអោយថេប្លេតនេះអាចបញ្ឈរបាន និងប្រើប្រាស់ជាទម្រង់កុំព្យូទ័រឡេបថបបានថែមទៀតនៅក្នុងពេលធ្វើការ ឬការបង្កើតនូវភាពច្នៃប្រឌិតជាដើម។ ខុសប្លែកពី wireless keyboard accessories ធម្មតានោះ សម្រាប់ម៉ូឌែលនេះ មិនមានបញ្ចូលនូវថាមពលថ្មនោះទេ។ ជំនួសមកវិញ គឺការភ្ជាប់ទៅថេប្លេតនេះតាមរយៈការប្រើប្រាស់នូវ Pogo Pin interface តែម្តង។

ក្រុមហ៊ុន Samsung បានបំពាក់នូវគ្រាប់ចុច 80 គ្រាប់នៅលើ keyboard នេះ ដែលឌីស្សាញឡើងទម្រង់ស្រដៀងទៅនឹងកុំព្យូទ័រផងដែរដែលផ្តល់នូវភាពងាយស្រួលក្នុងការវាយអត្ថបទ និងប្រើប្រាស់មែនទែន។ បន្ថែមពីនេះ Touchpad របស់នៅលើក្តាចុច ក៏មានទំហំធំជាងមុនដល់ទៅ 14.6% ដែលពង្រឹងទៅលើការងារ multi-tasking និងផលិតភាពការងារផងដែរ។ Keyboard នេះមានទម្ងន់ 636g។ Galaxy Tab S11 Ultra Pro Keyboard នេះមានតម្លៃប្រហែលជា 280$ ៕