ដូចដែលបងប្អូនបានដឹងរួចមកហើយថា ភីកអាប់ Toyota Hilux Travo ស៊េរីឆ្នាំ 2026 ជំនាន់ថ្មី ទើបតែបានបង្ហាញខ្លួនជាផ្លូវការនៅលើទីផ្សារប្រទេសមួយចំនួនហើយ ដែលមកដល់លើកនេះ ក្រុមហ៊ុនជប៉ុនមួយនេះ បានធ្វើការផ្លាស់ប្តូរ និងបានអាប់ដេតជាច្រើន ជាពិសេសគឺដំណើរការម៉ាស៊ីន និងផ្នែកខាងក្នុងតែម្តង។ ថ្មីៗនេះ ក្រុមហ៊ុន Toyota បានបញ្ចេញនូវវីដេអូឃ្លីប បង្ហាញឲ្យឃើញនូវការបើកបរតេស្តសមត្ថភាព នៅលើផ្លូវ Off-road របស់ Hilux Travo ដោយសម្ញែងនូវសមត្ថភាពមិនធម្មតាមែន។

Toyota Hilux Travo ឆ្នាំ 2026 នេះ គឺមានការបំពាក់ម៉ាស៊ីនម៉ាស៊ូតចំណុះ 2.8L Turbo ទំហំ 4 ស៊ីឡាំង ដដែល ប៉ុន្តែមានបន្ថែមជម្រើស Mild-Hybrid និងម៉ាស៊ីនសាំង ចំណុះ 2.7L ផងដែរ។ អ្វីដែលគួរឲ្យភ្ញាក់ផ្អើលបំផុតនោះ គឺការបន្ថែមជម្រើសអគ្គិសនីសុទ្ធ ដោយប្រើម៉ូទ័រអគ្គិសនីចំនួន 2 ដែល អាចបង្កើតកម្លាំងបាន 193 សេះ ហើយនឹងមានប្រើកញ្ចប់អាគុយទំហំ 59.2 kWh ដែលអាចបើកបរបានចម្ងាយ 240 KM (WLTP) នៅពេលសាកភ្លើងពេញម្តងថែមទៀតផង។ ភីកអាប់នេះ នៅតែមានសមត្ថភាពអាចដឹក 1 តោន និងអូសសណ្តោង 3.5 តោនដដែល។

ទៅលើការឌីស្សាញវិញ Toyota Hilux Travo ឆ្នាំ2026 បានប្រើប្រាស់គ្រោងឆ្អឹង IMV Ladder-frame ដែលទទួលបានការអាប់ដេត ពោល គឺមិនប្រើគ្រោងឆ្អឹង TNGA-F ដូចទៅនឹងប្រភេទ Tacoma និង Land Cruiser នោះទេ។ រថយន្តភីកអាប់ថ្មីនេះ នៅតែមានប្រវែងតួខ្លួន 5,32m និងគម្លាតពីកង់មុខទៅកង់ក្រោយ 3,08m។

មកលើកនេះ Toyota Hilux Travo បានប្តូរមកប្រើចង្កូតអេឡិចត្រូនិចថ្មី និងកែកុនប្រព័ន្ធជើងក្រោមផងដែរ។ អ្វីដែលជាចំណុចផ្លាស់ប្តូរធំបំផុតនោះ គឺកាប៊ីនខាងក្នុងរបស់វា ដោយបានរៀបចំឡើងវិញថ្មីទាំងស្រុង ហើយមានបំពាក់អេក្រង់កម្សាន្ត Touchscreen ទំហំ 12.3 អ៊ីញ និងកុងទ័រឌីជីថល ទំហំ 12.3 អ៊ីញ ផងដែរ។