GAC Group បានបើកមជ្ឈមណ្ឌលស្រាវជ្រាវ និងអភិវឌ្ឍន៍ថ្មីនៅប្រទេសអ៊ីតាលី “GAC R&D Center Europe”

ថ្មីៗនេះ GAC Group បានប្រកាសបើកមជ្ឈមណ្ឌលស្រាវជ្រាវ និងអភិវឌ្ឍន៍ GAC Europe ឬហៅថា GAC R&D Center Europe នៅទីក្រុង Milan ប្រទេសអ៊ីតាលី។ មជ្ឈមណ្ឌល R&D  ថ្មីនេះ គឺជាផ្នែកមួយនៃបេសកកម្មដែលកំពុងបន្តរបស់ក្រុមហ៊ុន GAC ដើម្បីឆ្ពោះទៅកាន់សកលលោក ហើយការចាប់ផ្តើមនៃមជ្ឈមណ្ឌល R&D Center Europe គឺជាព្រឹត្តិការណ៍ដ៏សំខាន់មួយទៀតនៅក្នុងយុទ្ធសាស្ត្រពង្រីកអាណាចក្រទីផ្សាររបស់ក្រុមហ៊ុន។ មជ្ឈមណ្ឌលថ្មីនេះ បានប្រមូលផ្តុំដោយធនធានឧស្សាហកម្មកំពូលរបស់ពិភពលោក រួមទាំងអ្នកផ្គត់ផ្គង់ឈានមុខគេ និងស្ថាប័ន R&D ដែលបង្កើតបានជាប្រព័ន្ធអេកូឡូស៊ីនៃឧត្តមភាពសកល ដើម្បីពង្រឹងសមត្ថភាពច្នៃប្រឌិត និងការរចនារួម។ 

រោងចក្រ GAC Milan កំពុងដើរតួនាទីយ៉ាងសំខាន់ក្នុងការអនុវត្តគម្រោង R&D របស់ក្រុមហ៊ុននៅបរទេស។ យោងតាមការផ្លាស់ប្តូរយុទ្ធសាស្ត្ររយៈពេលវែង ក្រុមការងារគ្រោងនឹងផ្តល់អាទិភាពដល់ការស្រាវជ្រាវនាពេលអនាគតសម្រាប់ការរចនារថយន្ត គំនិតច្នៃប្រឌិត និងការរចនាម៉ូដែលនៅមុនការផលិត ហើយស្វែងយល់ពីវិស័យបច្ចេកវិទ្យាដែលកំពុងរីកចម្រើននៅដំណាក់កាលក្រោយៗ។ លោក Zhang Fan អនុប្រធាននៃ GAC R&D Centre បាននិយាយថា “ការរចនា គឺជាតម្លៃដ៏សំខាន់បំផុតមួយសម្រាប់សម្ព័ន្ធក្រុមហ៊ុន GAC Group ហើយនៅក្នុងទីផ្សារនាពេលបច្ចុប្បន្ននេះ គឺជាកត្តាសម្រេចចិត្តដ៏សំខាន់សម្រាប់អតិថិជន។ 

យើងបានជ្រើសរើសទីក្រុង Milan ជាមជ្ឈមណ្ឌលរចនាប្រចាំនៅតំបន់អឺរ៉ុបជាលើកដំបូងរបស់យើង ដើម្បីបង្ហាញនូវអត្តសញ្ញាណវប្បធម៌ និងការច្នៃប្រឌិតដ៏រឹងមាំក្រុមហ៊ុន ដែលរួមបញ្ចូលគ្នានូវគំនិតនៃចលនា ការច្នៃប្រឌិត និងបេតិកភណ្ឌនៃរចនាបថ និងការរចនា។” លោក Stephane Janin នាយកប្រតិបត្តិការទូទៅផ្នែក GAC Advanced Design Europe នឹងត្រួតពិនិត្យប្រតិបត្តិការនៅរោងចក្រថ្មីនៅទីក្រុង Milan ។ លោក Janin ត្រូវបានគេស្គាល់ថាជា "ម្ចាស់នៃការរចនាគំរូរថយន្ត" ក្នុងឧស្សាហកម្មរចនា និងជាអតីតប្រធានផ្នែករថយន្តគំរូរបស់ក្រុមហ៊ុន Renault។

Janin នឹងដឹកនាំក្រុមការងារ “Made in Europe” ដែលមានទេពកោសល្យ ចូលរួមដោយសមាជិកនៃស្ទូឌីយ៉ូ GAC Design ក្នុងប្រទេសចិន និងសហរដ្ឋអាមេរិក។ ជាមួយគ្នា ពួកគេនឹងដើរតួយ៉ាងសកម្មនៅក្នុងសហគមន៍ច្នៃប្រឌិតនៅក្នុងរោងចក្រង GAC Milan ដែលសម្របសម្រួលនៃការផ្លាស់ប្តូរគំនិតច្នៃប្រឌិត និងការអនុវត្តនៅកម្រិតសកល។ ដោយមានការគាំទ្រពីក្រុមថ្មី GAC MOTOR អាចប្រើប្រាស់វប្បធម៌ និងភាពប៉ិនប្រសប់នៅតំបន់អឺរ៉ុប ក៏ដូចជាបទពិសោធន៍យ៉ាងទូលំទូលាយក្នុងតំបន់ក្នុងការផលិតនៃបណ្តាញ R&D និងទស្សនវិស័យនៃការរចនារីកចម្រើន ដើម្បីបង្កើនភាពទាក់ទាញ និងតម្លៃនៃរថយន្ត GAC MOTOR ។

ក្រុមហ៊ុនផលិតរថយន្ត GAC Group បាននាំចេញ 23,544 គ្រឿងនៅចន្លោះខែមករាដល់ខែកញ្ញាឆ្នាំ 2022 កើនឡើង 84% ពីមួយឆ្នាំទៅមួយឆ្នាំ។ ចាប់តាំងពីចូលទីផ្សារអន្តរជាតិ GAC MOTOR បានបង្កើតបណ្តាញប្រព័ន្ធចែកចាយនៅក្រៅប្រទេសជាង 28 ប្រទេស និងតំបន់។ ដោយមើលឃើញពីសក្ដានុពលនាំចេញដ៏ជោគជ័យរបស់ឧស្សាហកម្មរថយន្ត ពិធីសម្ពោធមជ្ឈមណ្ឌល GAC R&D Europe នឹងផ្តល់ឱកាសដ៏កម្រមួយ ដើម្បីទទួលបានការចូលប្រើប្រាស់កាន់តែស៊ីជម្រៅដល់អតិថិជននៅបរទេស ជាមួយនឹងធនធានជាច្រើនជម្រើស៕