កាលពីថ្ងៃទី 20 ខែកក្តដា កន្លងទៅ BYD បានប្រកាសថា មកទល់នឹងពេលនេះរថយន្តអគ្គិសនីសុទ្ធម៉ូដែល BYD Song Plus Series របស់ខ្លួន គឺលក់បានចំនួន 1,000,000 គ្រឿង ធ្វើឲ្យ Song Plus ក្លាយជារថយន្តអគ្គិសនី SUV ដំបូងគេក្នុងប្រទេសចិនដែលលក់បានចំនួនច្រើនបំផុតដូចនេះ។ បច្ចុប្បន្ន BYD Song Plus Series គឺមានចំនួនពីរម៉ូដែល រួមមានម៉ូដែល Song Plus DM-i ជាប្រភេទ Plug-in-hybrid និងម៉ូដែលប្រើថាមពលអគ្គិសនីសុទ្ធ ដោយពួកវាត្រូវបានផលិតឡើងនៅក្នុងខែ្សសង្វាក់ BYD Dynasty Product Line។
កាលពីដើមឆ្នាំ 2024 នាថ្ងៃទី 03 ខែមករា នៅក្នុងរោងចក្រ Auto’s Xi’an របស់ BYD បានធ្វើការផលិតរថយន្តម៉ូដែលពិសេស Song Plus Champion Edition ចំនួន 80 ម៉ឺនគ្រឿងត្រូវបានរំកឹលចេញពីខ្សែសង្វាក់ផលិត។ ស្របពេលជាមួយគ្នានេះ BYD ប្រកាសថា Song Plus Series បានឈ្នះជើងឯកនៃការលក់រថយន្តអគ្គិសនី SUV ប្រភេទ Plug-in-Hybrid ពីរឆ្នាំ កន្លះជាប់ៗគ្នា ជាមួយនឹងបរិមាណលក់ប្រចាំឆ្នាំចំនួន 390,213 គ្រឿងក្នុងឆ្នាំ 2023 ទោះបីជាមានការថយចុះពីមួយឆ្នាំទៅមួយឆ្នាំប្រមាណ 14.81% ក៏ដោយ ។ ហើយក៏ជាម៉ូដែលជាប់ចំណាត់ថ្នាក់ទី 2 សម្រាប់ការលក់រថយន្តប្រភេទ SUV ក្នុងប្រទេសចិនផងដែរ។
ជាបន្តបន្ទាប់ BYD បានធ្វើការបំបែកម៉ូដែល Song Plus របស់ខ្លួនទៅជាច្រើនស៊េរី តួរយ៉ាងដូចជាកាលពីខែកុម្ភៈ ឆ្នាំនេះ BYD បានបញ្ចេញម៉ូដែល Song Plus DM-i ឬ EV Honor Edition ចូលទីផ្សារ ដែលមានតម្លៃចាប់ពី $17,800 ឡើងទៅ។ ជាមួយគ្នានេះ BYD ត្រូវបានគេដឹងទៀតថា ត្រៀមធ្វើការប្រកាសចេញម៉ូដែលថ្មី Song Plus DM-i ស៊េរីឆ្នាំ 2025 នៅថ្ងៃទី 25 ខែកក្កដា ខាងមុខនេះ ដោយម៉ូដែលថ្មីឆ្នាំ 2025 ត្រូវបានគេរំពឹងថា នឹងត្រូវបានដាក់ឱ្យដំណើរការជាផ្លូវការជាមួយនឹងបច្ចេកវិទ្យា DM ជំនាន់ទីប្រាំរបស់ BYD។
BYD Song Plus DM-i ស៊េរីឆ្នាំ 2025 ត្រូវបានគេដឹងទៀតថា នឹងមានជម្រើសកញ្ចប់អាគុយអគ្គិសនីទំហំ 18.3kWh និង 26.6kWh Blade battery ដូចម៉ូដែលបច្ចុប្បន្នដែរ។ បើតាមរបាយការណ៍ពីស្ថាប័ន WLTC បានបញ្ជាក់ថា Song Plus DM-i 2025 នឹងអាចបើកបរដោយប្រើថាមពលអាគុយសុទ្ធបានចម្ងាយផ្លូវ 91km និង 128km ជាមួយនឹងកម្រិតស៊ីសាំងប្រមាណជា 4.95L/100km និង 4.98L/100km។ BYD Song Plus DM-i ស៊េរីឆ្នាំ 2025 អាចនឹងមានតម្លៃចាប់ពីខ្ទង់ $20,600។ រថយន្ត Compact-SUV ស៊េរីថ្មីនេះនឹងរក្សាទំហំវិមាត្រដូចម៉ូដែលបច្ចុប្បន្នដដែល គឺ 4775/1890/1670 mm និងគម្លាតកង់មុខទៅកង់ក្រោយ 2,765mm។
នៅក្នុងខែមិថុនា ឆ្នាំ 2024 រថយន្ត BYD Song Plus DM-i លក់បានចំនួន 32,103 គ្រឿង ការលក់កើនឡើងប្រមាណ 35.3% ពីមួយឆ្នាំទៅមួយឆ្នាំ និងប្រមាណ 0.1% ធៀបមួយខែទៅមួយខែ។ ហើយការលក់ពេញមួយឆមាសនៃឆ្នាំ 2024 ការលក់ Song Plus DM-i គឺមានចំនួន 116,221 គ្រឿង និងម៉ូដែល Song Plus EV លក់បានចំនួន 13,458 គ្រឿង ដែលសរុបការលក់ Song Plus Series ទាំងពីរម៉ូដែលក្នុងឆមាសដំបូងនៃឆ្នាំនេះ គឺមានចំនួន 58,435 គ្រឿង។ មកទល់នឹងពេលបច្ចុប្បន្ននេះ រថយន្តអគ្គិសនីថ្មី ឬ New Energy Vehicle របស់ BYD ត្រូវបានដាក់លក់នៅក្នុងប្រទេស និងតំបន់ចំនួន 88 និងទីក្រុងជាង 400 ជុំវិញពិភពលោក។
ក្នុងពេលបច្ចុប្បន្ន BYD ក៏មានមូលដ្ឋានផលិតកម្មនៅក្នុងប្រទេសដូចជា ប្រទេសថៃ ប្រេស៊ីល ហុងគ្រី និងអ៊ូសបេគីស្ថាន។ ថ្មីៗនេះនៅឯកម្មវិធី Guayaquil Auto Show នៅប្រទេសអេក្វាឌ័រ BYD បានរៀបចំសន្និសិទក្នុងការដាក់ឲ្យដំណើរការនូវប្រព័ន្ធបច្ចេកវិទ្យាថ្មី Song Plus DM-i របស់ខ្លួនផងដែរ៕