តាមរយះការចុះបញ្ចីប៉ាតង់រថយន្តថ្មីរបស់ក្រុមហ៊ុន BYD នៅក្នុងប្រទេសចិន គឺបានបង្ហាញពីរថយន្ត Pick Up ស៊េរីថ្មីមួយ។ រថយន្ត Electric Pick Up ស៊េរីថ្មីនេះត្រូវបានរចនាដោយអ្នករចនារថយន្តដ៏ល្បីឈ្មោះ គឺលោក Wolfgang Josef Egger ហើយរថយន្តស៊េរីថ្មីនេះ ត្រូវបានគេដឹងថា BYD នឹងធ្វើការប្រកាសបង្ហាញចេញនៅមុនដំណាច់ឆ្នាំ 2023 នេះ។
ថ្វីបើថ្មីៗនេះ BYD ទើបតែបានប្រកាសចេញរថយន្ត Pick Up សម្រាប់អ្នកចូលចិត្តការធ្វើដំណើរបែប Off-road និងផ្សងព្រេង ដែលពាក់ស្លាកយីហោ YangWang និង Fang Cheng Bao ហើយក្តី ប៉ុន្តែ សម្រាប់រថយន្ត Pick Up Truck ថ្មីនេះ គឺនឹងពាក់ស្លាកយីហោ BYD ផ្ទាល់តែម្តង។ BYD មិនបានបង្ហើបពីកាលបរិច្ឆេទសម្រាប់ការប្រកាសចេញរថយន្ត Electric Pick Up Truck ថ្មីរបស់ខ្លួននោះទេ ប៉ុន្តែ បើតាមប្រភពពីប្រព័ន្ធផ្សព្វផ្សាយក្នុងប្រទេសចិនបានបង្ហើបថា រថយន្តស៊េរីថ្មីនេះ នឹងបង្ហាញវត្តមានក្នុងពេលណាមួយនៅត្រីមាសទី 4 នៃឆ្នាំ 2023 នេះ ហើយ Electric Pick Up Truck ថ្មីនេះ អាចជាផ្នែកមួយនៃត្រកូល Ocean Series របស់ BYD។
សម្រាប់ថាមពលដំណើរការរបស់រថយន្ត BYD Pick Up Truck ថ្មីនេះ អាចនឹងមានពីរជម្រើស គឺប្រភេទកូនកាត់ឬហៅថា Plugin-Hybrid និងប្រភេទប្រើថាមពលអគ្គិសនីសុទ្ធ all-electric version។ បើតាមគំរូឌីស្សាញរបស់រថយន្ត Pick Up Truck ថ្មីនេះ បង្ហាញថា នៅផ្នែកសំណាញ់ប៉ាណាមុខមានរំលេចដោយស្លាកសញ្ញា BYD ដ៏ធំជាមួយរបាំងដែកការពារដ៏ធំ និងផ្ទាំងដែកការពារភក់ផ្នែកខាងក្រោមដ៏ធំផងដែរ។ នៅលើដំបូលមានភ្ជាប់ដោយកាងសម្រាប់ទ្រឥវ៉ាន់ចំនួនពីរសងខាង និងមានដំបូលបើកតូច។ រថយន្ត BYD Pick Up Truck នេះត្រូវបានគេប្រទេសឃើញធ្វើការតេស្តសាកល្បងនៅក្នុងប្រទេសចិនកាលពីប៉ុន្មានខែមុខនេះម្តងរួចទៅហើយ។ ចំនែករូបភាពបែកធ្លាយដំបូងរបស់រថយន្តថ្មីនេះ ត្រូវបានគេទម្លាយចេញកាលពីអំឡុងខែវិចិ្ឆកា ឆ្នាំ 2022។
BYD Pick Up Truck ស៊េរីថ្មីនេះអាចជាម៉ូដែលកូនកាត់ប្រភេទ PHEV ដែលបំពាក់ប្រព័ន្ធម៉ាស៊ីន ICE Engine ស៊េរី DM-p ដែលជា Platform PHEV របស់ BYD សម្រាប់ស្រឡាយរថយន្ត Off-road។ បើផ្នែកទៅលើរូបភាពអាចឲ្យគេសន្និដ្ឋានបានថា BYD Pick Up Truck ស៊េរីថ្មីនេះ អាចមានប្រវែងប្រមាណជា 5.3 ម៉ែត្រ និងកម្ពស់ប្រមាណជា 1.8 ម៉ែត្រ។ រថយន្តស៊េរីថ្មីនេះ ក៏នឹងបំពាក់ប្រព័ន្ធម៉ាស៊ីន Hybrid ទំហំ 1.5T ICE Engine អាចផលិតកំលាំងបាន 139hp និងដំណើរការដោយប្រព័ន្ធម៉ូទ័រអគ្គិសនីចំនួនពីរដែលសរុបថាមពលបញ្ចូលគ្នាអាចផលិតកំលាំងបាន 489hp។ ហើយ BYD Pick Up Truck ស៊េរីថ្មីនេះ ក៏អាចនឹងប្រើប្រាស់មុខងារ Head Up Display របស់ Huawei ថែមទៀតផង៕