ក្រុមហ៊ុន Xiaomi បានប្រកាសថា ខ្លួនបាននាំចេញរថយន្តអគ្គិសនីចំនួន 29,000 គ្រឿងក្នុងខែមីនាកន្លងទៅ ដែលនេះ គឺជាកំនត់ត្រាថ្មីប្រចាំខែថ្មី។ ដោយកាលពីថ្ងៃទី 18 ខែមិនា ក្រុមហ៊ុន Xiaomi បានប្រកាសថា ខ្លួនបាននាំចេញរថយន្តបានចំនួន
200,000 គ្រឿង។ Xiaomi បានចេញលក់រថយន្តអគ្គិសនីរបស់ខ្លួននៅក្នុងទីផ្សារប្រទេសចិនតែមួយប៉ុណ្ណោះ។ ក្រុមហ៊ុន Xiaomi បានធ្វើការនាំចេញរថយន្តបានចំនួនជាង 20,000 គ្រឿងក្នុងមួយខែ សម្រាប់រយះពេល 6 ខែជាប់ៗគ្នា។
ក្រុមហ៊ុន Xiaomi បានប្រកាសចេញលក់រថយន្តអគ្គិសនីដំបូងរបស់ខ្លួនម៉ូដែល Xiaomi SU7 Series នៅថ្ងៃទី 28 ខែមីនា ឆ្នាំ 2024។ ក្រុមហ៊ុនបច្ចេកវិទ្យាស្មាតហ្វូនដ៏ល្បាញល្បីរបស់ពិភពលោកមួយនេះ បានចុះបញ្ជីរថយន្តអគ្គិសនីចំនួន 186,112 គ្រឿងក្នុងរយៈពេល 11 ខែដំបូង (ចន្លោះខែមេសា ឆ្នាំ 2024 ដល់ខែមីនា ឆ្នាំ 2025) នេះបើយោងតាមរបាយការណ៍ពីក្រុមហ៊ុន China EV DataTracker។ ជាមួយនឹងការនាំចេញបានជាង 29,000 គ្រឿងក្នុងខែមីនា បានធ្វើឲ្យចំនួននៃការចែកចាយរថយន្តអគ្គិសនីរបស់ Xiaomi កើនឡើងដល់ជាង 215,112 គ្រឿងក្នុងរយៈពេល 12 ខែដំបូង ចាប់តាំងពីការចេញនាំចេញពីខែមេសា 2024 ដល់ខែមីនា 2025។
Xiaomi បានប្រកាសដាក់គោលដៅក្នុងការនាំចេញរថយន្តអគ្គិសនីរបស់ខ្លួនសម្រាប់ឆ្នាំ 2025 នេះឲ្យបានចំនួន 350,000 គ្រឿង។ ក្នុងត្រីមាសដំបូងនៃឆ្នាំ 2025 ក្រុមហ៊ុន Xiaomi បាននាំចេញរថយន្តចំនួន 75,625 គ្រឿងនៅក្នុងទីផ្សារប្រទេសចិន។ Xiaomi បានចេញលក់រថយន្តអគ្គិសនីដំបូងរបស់ខ្លួនតែមួយម៉ូដែលប៉ុណ្ណោះ គឺ Xiaomi SU7 ដែលជារថយន្ត sedan មានជម្រើសចំនួន 3 Options គឺ SU7, SU7 Pro និង SU7 Max ជាមួយតម្លៃចាប់ពីខ្ទង់ $29,700 ឡើងទៅនៅទីផ្សារប្រទេសចិន។
ដោយឡែកកាលពីខែកុម្ភៈ Xiaomi ក៏បានបញ្ចេញម៉ូដែលពិសេសថ្មីមួយបន្ថែមទៀត គឺ SU7 Ultra ដែលជា Supercar EV ដែលបំពាក់ម៉ូទ័រអគ្គិសនី 3 មានកំលាំងសរុបដល់ 1,526 សេះ ជាន់ស្ទុះពីកុងទ័រ 0 ទៅ 100km/h ចាយពេលប្រមាណ 1.98 វិនាទីប៉ុណ្ណោះ។Xiaomi SU7 Ultra មានតម្លៃខ្លួនខ្ទង់ $72,900។ SU7 Ultra មកជាមួយកញ្ចប់ថ្មទំហំ 93.7kWh ផលិតដោយក្រុមហ៊ុន CATL ដែលសាកភ្លើងមួយពេញម្តងជិះបានចម្ងាយ 630km។
ទន្ទឹងនឹងភាពជោគជ័យខ្លាំងក្នុងទីផ្សាររថយន្តអគ្គិសនីទោះបីជាអ្នកលេងដៃថ្មីក្នុងវិស័យមួយនេះ ក្រុមហ៊ុនបច្ចេកវិទ្យាស្មាតហ្វូន និងឧបករណ៍អេឡិចត្រូនិចល្បីឈ្មោះដែលមានទីស្នាក់ការក្រុមហ៊ុនក្នុងទីក្រុងប៉េកាំងប្រទេសចិនមួយនេះ បានត្រៀមបញ្ចេញរថយន្តម៉ូដែលទីពីរជាប្រភេទ SUV ដែលមានឈ្មោះថា Xiaomi YU7 ក្នុងពេលឆាប់ៗក្នុងឆ្នាំនេះ ដែលអាចក្នុងខែកក្តដា ហើយ YU7 ត្រូវបានគេដឹងថា នឹងក្លាយជាគូប្រជែងជាមួយនឹងរថយន្តអគ្គិសនីរបស់អាមេរិក Tesla Model Y នៅក្នុងទីផ្សារប្រទេសចិនផងដែរ៕
