យោងតាមរបាយការណ៌ថ្មីនៅថ្ងៃនេះ បានបញ្ជាក់ថា BYD បានបន្តគ្រប់គ្រងចំណែកទីផ្សាររថយន្តរយៈពេល 2 ត្រីមាសជាប់ៗគ្នាដែលនេះអាចបញ្ជាក់ពីការផ្លាស់ប្តូរយ៉ាងខ្លាំងទៅលើឧស្សាហកម្មនៃការនាំចេញរថយន្តអគ្គិសនីនៅលើទីផ្សារសកល។ ជាមួយគ្នានេះតាមការវិភាគរបស់ក្រុមអ្នកជំនាញក៏បាននិយាយដែរ ការផ្លាស់ប្តូរនេះ នឹងបន្តរីកលូតលាស់កាន់តែខ្លាំងថែមទៀតនៅក្នុងឆ្នាំ 2025 នេះ។
យោងតាមទិន្នន័យថ្មីរបស់ Counterpoint Research នៅពេលនេះ បានបង្ហាញពីការព្យាករណ៌ថា BYD បានពង្រីកវិសាលភាពរបស់ខ្លួនជាមួយយុទ្ធសាស្រ្តបច្ចេកវិទ្យាទំនើប និងរបកគំហើញថ្មីៗ ដោយអាចប្រកួតប្រជែងបានជាមួយ Tesla ដែលជាក្រុមហ៊ុនមានភាពជោគជ័យយូរឆ្នាំមកហើយ។
ប្រភពខាងលើនេះ បានបន្តថា នៅត្រីមាសទី 1 ឆ្នាំ 2025 នេះ ក្រុមហ៊ុនផលិតរថយន្តអគ្គិសនីដ៏ធំបំផុតរបស់ប្រទេសចិនមួយនេះ បាននាំចេញរថយន្ត BEVs របស់ខ្លួនបានចំនួនដល់ទៅ 416,388 គ្រឿង ដោយបាននាំមុខក្រុមហ៊ុនរថយន្ត Tesla របស់អាមេរិក ដែលអាចធ្វើបានត្រឹមតែ 336,681 គ្រឿងប៉ុណ្ណោះសម្រាប់រយៈពេលដូចគ្នា។ ហើយបើមើលទៅលើត្រីមាសទី 4 ឆ្នាំ 2024 កន្លងទៅនេះ BYD ក៏មានការនាំចេញរថយន្ត BEVs បានចំនួន 595,413 គ្រឿងផងដែរ ប្រៀបធៀបជាមួយនិង Tesla គឺមានចំនួន 495,570 គ្រឿង។
សូមជំរាបថា BYD ធ្លាប់បាននាំមុខ Tesla ជាលើកដំបូងនៅត្រីមាសទី 4 ឆ្នាំ 2023 ជាមួយនិងការនាំចេញបាន 595,413 គ្រឿង ដោយក្រុមហ៊ុនផលិតរថយន្តអគ្គិសនីរបស់អាមេរិកអាចធ្វើបានចំនួន 484,507 គ្រឿងប៉ុណ្ណោះ។ ប៉ុន្តែការនាំមុខនេះត្រូវបានក្រុមហ៊ុន Tesla បង្អាក់វិញនៅត្រីមាសបន្ទាប់ ដែលបាននាំមុខ BYD ទៅលើការនាំចេញក្នុងរយៈពេល 1 ឆ្នាំពេញ។ នៅក្នុងពេល 1 ឆ្នាំ 2024 កន្លងទៅក្រុមហ៊ុន BYD បានធ្វើការនាំចេញនូវរថយន្ត BEV បានជាង 1,764,992 លានគ្រឿង ខណៈដែលក្រុមហ៊ុន Tesla ធ្វើបានខ្ពស់ជាងដល់ទៅ 1,789,226 គ្រឿង។
តាមរបាយការណ៍ព្យាករណ៍ថ្មីពី Counterpoint Research ទៅលើរថយន្តអគ្គិសនីនៅលើទីផ្សារសកលនាពេលថ្មីៗនេះ បានបញ្ជាក់ថា BYD គឺមានការនាំមុខជាលើកដំបូងទៅលើក្រុមហ៊ុន Tesla សម្រាប់រថយន្តដែលមានការប្រើប្រាស់អាគុយអគ្គិសនីនៅលើទីផ្សារសកល ដោយមានចំណែកដល់ទៅ 15.7%។ ជាមួយនិងការទទួលបានបាននេះ ក៏មានការរំពឹងថា ក្រុមហ៊ុន BYD នឹងបន្តធ្វើការពង្រីកវិសាលភាពកាន់តែខ្ពស់ជាងនេះទៀតទៅលើសង្វាក់ផលិតកម្ម ក៏ដូចជាការគាំទ្រពីគោលនយោបាយដែលមានស្រាប់នៅក្នុងប្រទេសចិន។
