ដើម្បីផ្តល់អោយអ្នកលេងហ្គេមនូវកុំព្យូទ័រលេងហ្គេមដែលមានសមត្ថភាព និងមានអនុភាពដ៏ល្អបំផុតនោះ ក្រុមហ៊ុន MSI បានបង្ហាញនូវកុំព្យូទ័រស៊េរីថ្មីរបស់ខ្លួន ដែលបំពាក់នូវអេក្រង់ទំហំ 17 អ៊ីង ដែលមានលេខកូដ GE75 Raider ដែលជាជំនាន់ថ្មីមួយទៀតនៃអធិរាជហ្គេមនេះ។ កុំព្យូទ័រលេងហ្គេមនេះ មានគែមព័ទ្ធ អេក្រង់ស្តើង និងការរចនារូបរាងកាន់តែស្រស់ស្អាតទាក់ទាញបំផុតក្នុងការប្រើប្រាស់។ ក្រុមហ៊ុន MSI បានបញ្ជាក់ថា “កុំព្យូទ័រ GE series ត្រូវបានរចនាឡើងសម្រាប់អ្នកលេងហ្គេមជាច្រើន ដែលមានចំណង់នៅក្នុងការលេងហ្គេមពិតៗ។ កុំព្យូទ័រនេះ គឺមានសមត្ថភាពខ្លាំងក្លា និងជាអាវុធមួយក្នុងការលេងហ្គេមរបស់ពួកគេ។” សម្រាប់ការរចនាទៅលើកុំព្យូទ័រលេងហ្គេមនេះ គឺនឹងផ្តល់អោយអ្នកលេងហ្គេមជាច្រើនពេញចិត្តនៅក្នុងការជ្រើសរើស ដោយសារតែ GE 75 Raider នេះ គឺមានការបំផុសគំនិត ច្នៃប្រឌិតយ៉ាងស្រស់ស្អាតជាមួយនឹងឡូហ្គោរូបនាគថ្មី។
បើនិយាយអំពីអេក្រង់របស់កុំព្យូទ័រ GE75 Raider គឺមានការរចនាជាមួយនឹងគែមព័ទ្ធអេក្រង់ស្តើងដែលធ្វើឱ្យអ្នកលេងហ្គេមទទួលបាននូវបទពិសោធន៍នៃការទស្សនាកាន់តែអស្ចារ្យ។ អេក្រង់នេះ គឺមានទំហំ 17 អ៊ីង ជាមួយនឹងកម្រិត Refresh Rate 144Hz ហើយនិងមានកម្រិតពន្លឺ 3ms Overclockable Response Time ដែលនឹងផ្តល់នូវភាពរលូនក្នុងការលេងហ្គេមដែលមិនធ្លាប់ទទួលបានពីមុនមកនោះទេ។ ម្យ៉ាងទៀតនៅក្នុងនាមជាអ្នកខ្លាំងក្លានៅក្នុងផ្នែក True Gaming កុំព្យូទ័រ MSI GE75 Raider ត្រូវបានដំឡើងមកជាមួយនូវសមត្ថភាពខ្លាំងក្លា និងមានមុខងារថ្មីៗជាច្រើន អ្វីដែលអស្ចារ្យបំផុតនោះ គឺការភ្ជាប់នូវក្រាហ្វិកកាត NVIDIA® GeForce® GTX 1060 តែម្តង។ ជាមួយនឹងការប្រើប្រាស់នូវ Cooler Boost 5 Technology កុំព្យូទ័រ MSI នឹងធានាថា ការលេងហ្គេមនេះ គឺមានភាពស្ងប់ស្ងាត់បំផុតនៅក្នុងខណៈពេលលេងហ្គេម។
ក្រៅពីរបកគំហើញនៅក្នុងផ្នែក Hardware នេះ MSI ក៏មានតម្លើងមកជាមួយនូវកម្មវិធី MSI APP Player ដែលអនុញ្ញាតឱ្យអ្នកលេងហ្គេមជាច្រើន អាចរីករាយក្នុងការលេងហ្គេមស្មាតហ្វូនជាច្រើន នៅលើកុំព្យូទ័ររបស់ពួកគេបានផងដែរ។ សម្រាប់ Keyboards របស់វា ត្រូវបានក្រុមហ៊ុនភ្ជាប់ជាមួយនឹងភ្លើង lighting keycaps ផ្អែកទៅលើការជ្រើសរើសរបស់អ្នកលេងហ្គេមផ្សេងៗគ្នានោះ។ កុំព្យូទ័រ GE75 Raider ត្រូវបានគេជឿជាក់ថា នឹងអាចបំពេញនូវតម្រូវការរបស់អ្នកលេងហ្គេមជាមួយនឹងការរចនារូបរាងយ៉ាងស្រស់ស្អាត ការពង្រឹងទៅលើសមត្ថភាពនៃប្រព័ន្ធ Hardware និងការប្រើប្រាស់កម្មវិធី Software ផ្តាច់មុខ ដែលធ្វើឱ្យអ្នកលេងហ្គេមគ្រប់រូបពេញចិត្ត និងទទួលបានជោគជ័យជានិច្ច៕
