ដូចដែលយើងបានដឹងរួចហើយថា កាលពីអំឡុងព្រឹត្តិការណ៍ Computex 2024 នៅតៃវ៉ាន់ដែលប្រារព្ធធ្វើឡើងកាលពីពេលថ្មីៗនេះ ក្រុមហ៊ុនផលិតកុំព្យូទ័រហ្គេម (Gaming Laptop) ដ៏មានឥទ្ធិពលរបស់តៃវ៉ានបានធ្វើការប្រកាសបង្ហាញចេញនូវម៉ាស៊ីន Laptop ស៊េរីថ្មីៗជាច្រើនស៊េរីច្រើនម៉ូដែលតម្រូវតាមកម្រិតនៃការប្រើប្រាស់ ហើយក្នុងនោះក្រុមហ៊ុនក៏បានចាប់ដៃគូជាមួយក្រុមហ៊ុនផលិតរថយន្តប្រណិតកម្រិតអភិជន Mercedes-Benz ផលិត និងបង្ហាញចេញកុំព្យូទ័រម៉ូដែលពិសេសដែលមានឈ្មោះថា MSI Stealth 18 Mercedes-AMG Motorsport A1V។
កុំព្យ័រយួរដៃម៉ូដែលពិសេសនេះត្រូវបានសហការបង្កើតឡើយដែលក្រុមអ្នកជំនាន់ផ្នែករចនារបស់ MSI និង Mercedes ដែលធ្វើឲ្យ Laptop Special Edition មួយនេះ មានការរចនាថ្មីប្លែកពីបណ្តា Laptop របស់ MSI ផ្សេងទៀត។ ដោយតួរខ្លួនទាំងមូលរបស់ Stealth 18 Mercedes-AMG Motorsport A1V ត្រូវបានស្រោបពាសដោយលោហៈធាតុ Magnesium-Aluminum Alloy Chassisដែលមានភាពធន់រឹងមាំង ប៉ុន្តែ មានទំងន់ស្រាល។
ហើយដើម្បីបញ្ជាក់នូវសក្ខីភាពពីការចាប់ដៃគូសហការគ្នា គឺនៅលើផ្ទៃ Lid របស់ Laptop មួយនេះមានរំលេចដោយស្លាកសញ្ញាក្រុមហ៊ុន MSI និង Mercedes យ៉ាងប្រណិត រួមទាំងនៅផ្នែកគែមកញ្ចក់អេក្រង់មុខផងដែរ។ បន្ថែមពីនេះនៅលើផ្ទៃ Armrest ត្រូវបានរចនាឡើងជាមួយផ្ទៃបែបក្រឡាដែលទាញការឌីស្សាញចេញពីសំណាញ់ប៉ាណាមុខរបស់រថយន្ត Mercedes ព្រមទាំងរំលេចជាមួយគ្រាប់ Key ចម្រុះពណ៌យ៉ាងទាក់ទាញ។
MSI Stealth 18 Mercedes-AMG Motorsport A1V មានកម្រាស់ស្តើងល្មមត្រឹម 19.9mm ជាមួយទម្ងន់ស្រាលប្រមាណ 2.89 គីឡូក្រាម។ Laptop Special Edition របស់ MSI នេះ បំពាក់នូវបច្ចេកវិទ្យាអេក្រង់ mini-LED Display ទំហំធំដល់ 18-inch គាំទ្រកម្រិតបង្ហាញខ្ពស់ដល់ 4K លើខ្នាត 16:10 aspect ratio ជាមួយល្បឿន refresh rate 120Hz។ បន្ទះអេក្រង់របស់បច្ចេកវិទ្យាពណ៌កម្រិត VESA DisplayHDR 1000 និង 100% DCI-P color gamut រួមនឹងកម្រិតពន្លឺខ្ពស់ដល់ 1,000bits ដែលធ្វើឲ្យការបង្ហាញចេញពីផ្ទៃអេក្រង់ទទួលបានភ្លឺច្បាស់ ជាមួយកម្រិតទឹកពណ៌ច្បាស់ដិតត្រឹមត្រូវ 100% តែម្តង។
ចូលមកផ្នែកម៉ាស៊ីនវិញ MSI Stealth 18 Mercedes-AMG Motorsport A1V ត្រូវបានក្រុមហ៊ុនដាក់ឲ្យដំណើរការនៅលើកំពូលឈីបខួរក្បាលជំនាន់ចុងក្រោយរបស់ Intel គឺ Intel-core Ultra 9 Processor 185H ភ្ជាប់ដោយអង្គក្រាហ្វិចជំនាន់ចុងក្រោយរបស់ Nvidia ស៊េរី GeForce RTX4080 ទំហំ 12GB GDDR6 ជាមួយថាសរឹងផ្ទុកទិន្នន័យល្បឿនលឿនប្រភេទ NVMe PCIe Gen 4 SSD ព្រមជាមួយរន្ធសម្រាប់ដាក់រ៉េមបានចំនួនពីរដើមដែលគាំទ្រទំហំដល់ 96GB ថែមទៀតផង។
បន្ថែមពីនេះ Stealth 18 Mercedes-AMG Motorsport A1V នៅមានបំពាក់មកជាមួយប្រព័ន្ធ Nvidia Geforce RTX Studio ជាមួយប្រព័ន្ធ Speaker សំឡេងចំនួន 6 គ្រាប់ គាំទ្របច្ចេកវិទ្យាសំឡេង Dynaudio, ប្រព័ន្ធបន្សាបកម្តៅ Vapor Chamber Cooler ដំណើររួមជាមួយកង្ហារចំនួន 2 Fans + 4 Exhausts។
ហើយជាពិសេស Laptop ស៊េរីថ្មីម៉ូដែលពិសេសនេះ ក៏បំពាក់នូវប្រព័ន្ធបច្ចេកវិទ្យា MSI AI Engine ដើម្បីឲ្យការប្រើប្រាស់នៅលើ Laptop Special Edition មួយនេះប្រកបដោយភាពទំនើប និងមានប្រសិទ្ធិភាពខ្ពស់។ ក្រៅពីនេះ MSI Stealth 18 Mercedes-AMG Motorsport A1V នៅមានបំពាក់មកថ្មទំហំធំដល់ 99.9Whr, ប្រព័ន្ធកាមេរ៉ាវ៉ិបខេមប្រភេទ IR-FHD ដែលគាំទ្រមុខងារកាត់បន្ថយសំឡេងរំខាន HDR & 3D Noise Reduction Plus, ទ្រនាប់សែនស័រស្កែនក្រយ៉ៅម្រាមដៃដោះសោរសុវត្ថិភាព ក៏ដូចជាប្រព័ន្ធភ្លើង Ambient Mystic Light by SteelSeries GG ជាដើម៕
